Ndryshe nga raportimet e fundit në mediat italiane, Kristjan Asllani ka surprizuar me zgjedhjen e tij në këtë merkato verore. Mesfushori i kombëtares shqiptare është zyrtarisht futbollist i Torinos.
Sipas marrëveshjes së arritur mes palëve, lojtari kuqezi do t’i bashkohet klubit “Granata” në formë huazimi për sezonin aktual. Në fund të edicionit, Torino ka detyrim blerjeje të kartonit për shumën prej 15 milionë eurosh, duke siguruar përfundimisht shërbimet e mesfushorit shqiptar.
Ky transferim shihet si një hap i rëndësishëm për karrierën e Asllanit, i cili synon të marrë më shumë hapësira në fushë dhe të rrisë rolin e tij si titullar në Serie A. Torino, nga ana tjetër, forcon ndjeshëm repartin e mesfushës me një lojtar të ri, energjik dhe me përvojë në nivelet më të larta të futbollit italian.
