Reshjet e fundit të shiut ndihmuan në shuarjen e një pjese të vatrave të zjarrit në vend, por situata vijon të mbetet shqetësuese në disa zona. Aktualisht, një vatër aktive vijon në fshatin Spatharë të Skraparit, ndërkohë që dëmet në pyje janë të mëdha në disa qarqe të Shqipërisë së Veriut dhe të Mesme.
Sipas Ministrisë së Mbrojtjes, bilanci paraprak i dëmeve tregon për qindra hektarë të përfshirë nga flakët:
Në fshatin Plan i Bardhë dhe malin e Allushit në Klos janë djegur rreth 120 hektarë, ndërsa janë përshkuar nga flakët rreth 350 hektarë me shkurre, pisha dhe lisa.
Në Zall Gjoçaj, Mat janë djegur 20 hektarë dhe janë përfshirë 499 hektarë të tjera me shkurre, pisha dhe ah.
Në fshatin Gurë-Lurë, Dibër janë djegur 55 hektarë, ndërsa flakët kanë përshkuar 580 hektarë pyje dhe bimësi.
Në “Qafën e Buallit”, Bulqizë janë djegur 22 hektarë, ndërsa janë prekur 35 hektarë të tjera me shkurre, pisha dhe kullota.
Ndërkohë, Instituti i Gjeoshkencave njofton se sot priten reshje të dobëta në qarqet Kukës, Dibër, Elbasan, Berat dhe Korçë, të cilat mund të ndihmojnë në përmirësimin e situatës.
Sa i takon rrezikut për përhapje të zjarreve, qarku i Fierit mbetet më i rrezikuari për ditën e sotme, me nivel të lartë rreziku. Qarqet Elbasan, Berat, Korçë, Vlorë dhe Gjirokastër paraqesin rrezik të moderuar, ndërsa në Lezhë, Durrës dhe Tiranë rreziku mbetet i ulët.
Autoritetet u bëjnë thirrje qytetarëve për kujdes të shtuar dhe raportim të menjëhershëm të çdo vatre zjarri pranë shërbimeve emergjente.
