Një vatër e fuqishme zjarri është regjistruar pranë monumentit natyror “Syri i Kaltër”, duke rrezikuar seriozisht këtë destinacion të njohur turistik.
Sipas të dhënave paraprake, janë evakuuar mbi 500 turistë nga zona, ndërsa në hapësirat përreth numëroheshin mbi 100 automjete të parkuara.
Në terren ndodhen vetëm forcat zjarrfikëse të MZSH Finiq, të cilat po përballen me vështirësi për shkak të terrenit dhe mungesës së ndërhyrjes nga ajri. Autoritetet theksojnë se pa mbështetje ajrore, shuarja e flakëve dhe shpëtimi i monumentit natyror bëhet pothuajse i pamundur.
“Syri i Kaltër” është një nga asetet më të rëndësishme natyrore të Shqipërisë, i cili çdo vit tërheq mijëra vizitorë vendas dhe të huaj.
