Një zjarr i përmasave të mëdha ka përfshirë sot një sipërfaqe me shkurre pranë një lokali dasmash, buzë rrugës Lezhë–Milot. Për shkak të erës së fortë, flakët u përhapën me shpejtësi duke rrezikuar disa banesa përreth, si dhe një restorant të madh dasmash që ndodhet pranë zonës së përfshirë nga zjarri.
Forca të shumta zjarrfikëse u angazhuan menjëherë në terren për të penguar përhapjen e zjarrit dhe për t’i vendosur flakët nën kontroll. Pavarësisht përpjekjeve, flakët arritën të përfshijnë një pjesë të lokalit të dasmave, duke shkaktuar dëme materiale të konsiderueshme.
Sipas raportimeve zyrtare nga Ministria e Mbrojtjes, fatmirësisht nuk ka pasur dëme në njerëz dhe vatra e zjarrit është vënë nën kontroll. Megjithatë, dëmet materiale në zonë mbeten të mëdha dhe autoritetet po bëjnë vlerësimet përkatëse.
