Vlora është përballur sërish me ndërprerje të furnizimit me ujë të pijshëm, pasi një defekt i rëndë në rrjet detyroi Ujësjellës-Kanalizime Vlorë (UKV) të stakonte të gjitha stacionet e ujësjellësit.
Sipas një reagimi të UKV në rrjetet sociale, problemi u shkaktua nga një avari e rëndë në linjën e transmetimit të ujit nga Stacioni nr. 4 drejt depos kryesore të qytetit. Institucioni bëri me dije se ndërhyrja emergjente u përfundua dhe defekti u riparua pas rreth tre orësh pune.
Megjithatë, situata në terren duket ndryshe. Shumë qytetarë vlonjatë kanë denoncuar mungesën e ujit të pijshëm në banesat e tyre edhe pas njoftimit të UKV për rikthimin e normalitetit.
