Sektori i veshjeve në Shqipëri po përjeton ndryshime të rëndësishme, të nxitura jo vetëm nga tendencat e modës, por edhe nga zhvillimi i turizmit. Konsumatorët shqiptarë kërkojnë cilësi dhe stil duke zgjedhur markat e modës me çmime të përballueshme, ndërsa dyqanet tradicionale pohojnë se kanë rënie të shitjeve deri në 40% nga konkurrenca e lartë e qendrave tregtare dhe shitjeve online. Deri tani, qendrat tregtare kanë marrë 50% të tregut të dyqaneve në rrugët tregtare nga kërkesa e lartë për veshje të modës me çmime të lira
Shqiptarët vazhdojnë të vishen bukur dhe me stil duke zgjedhur kryesisht marka të modës me çmime të përballueshme, të cilat gjenden zakonisht në qendrat tregtare.
Blerjet e veshjeve në dyqanet e rrugëve tregtare rezultojnë se kanë humbur popullaritetin e dikurshëm.
Në vitin 2024, sipas të dhënave të Doganave, në total u importuan rreth 650 tonë veshje. Krahasuar me periudhën paraardhëse, sasia e importeve ra me 3,3%.
Tendenca rënëse ka vijuar edhe gjatë 2025-s. Në periudhën janar-gusht, sasia e importit arriti 338,3 tonë. Në raport me të njëjtën periudhë të 2024-s, importet ranë me 4%. Për 2024, tregu i veshjeve gjeneroi importe me vlerë rreth 16 milionë euro, apo 10% më pak se në vitin 2023.
(Të dhënat e Doganave për veshjet janë të kufizuara në katër grup-kapituj që përfshijnë veshje për burra dhe gra, si: xhupa, xhaketa, pallto, veshmbathje, robdishamër etj.)
Në 5 vitet e fundit, sasia më e ulët e importeve ishte në 2020. Operatorët e tregut pohojnë se rënia u ndikua nga kufizimet ekonomike të pandemisë së Covid-19.
Në vitin 2021, pati rritje mbi 60%, që tregon rikthim të kërkesës. Pas kësaj, në 2022, importet ranë ndjeshëm me rreth 17%, për shkak të pasojave ekonomike globale si rritja e inflacionit dhe kostot e transportit.
Në vitin 2023, tregu u përmirësua dhe importet u rritën përsëri 13%, duke treguar rikuperim të qëndrueshëm.
Sipas operatorëve kryesorë të tregut të markave të modës me çmime të lira, kërkesa është në rritje, ndërsa kategoria që shpenzon më shumë për veshje mbeten gratë duke përfshirë edhe blerjet për fëmijë.
Në të njëjtën kohë, vihet re rënie e kërkesës në dyqanet e vogla, të cilat po përballen me konkurrencë të shtuar nga rrjetet më të mëdha tregtare.
Linda, drejtuese e një dyqani veshjesh për gra në rrugën “Bardhyl”, e pranishme në treg prej vitit 1995 me veshje të modës me origjinë importi nga Turqia, pohon se në tërësi, qendrat tregtare kanë marrë 50% të tregut.
Ajo pohon se aktualisht, kërkesa, e përqendruar kryesisht te klientela besnike, është tkurrur me 30 deri në 40% krahasuar me vjet. Përveç konkurrencës së qendrave tregtare, faktorë pengues të rënies së shitjeve janë edhe emigracioni, rritja e çmimeve dhe rënia e fuqisë blerëse.
Stela Dhami, partnere drejtuese e “Colliers International” për Shqipërinë dhe Kosovën, njëkohësisht dhe analizuese e tregut retail, shpjegon se rënia e importeve nuk tregon tkurrje të tregut të veshjeve në tërësi, por shpërndarje gjithnjë e më shumë të kërkesës përmes strukturave më të mëdha dhe jo më përmes dyqaneve tradicionale.
“Zinxhirët kryesorë tregtarë të markave të veshjeve të gjithë raportojnë rritje në shitje, që do të thotë se konsumatori shqiptar në masë është i orientuar drejt produktit të pozicionuar me raport të drejtë çmim e cilësi.
Këto marka vazhdojnë të udhëheqin në tregje globale me këtë politikë të drejtë komerciale çmimesh.
Pra ka një zhvendosje të dukshme nga dyqanet e vogla drejt qendrave tregtare dhe shitjeve online. Qendrat ofrojnë më shumë komoditet, marka dhe oferta, ndërsa dyqanet e vogla po përballen me konkurrencë të fortë, kosto të larta dhe rënie të klientëve.
Pra kur një retail shqiptar blen veshje në Turqi dhe më pas i shet në tregun vendas me trefishin e çmimit, është e kuptueshme pse konsumatori heziton të blejë.
Sot, blerësi shqiptar është më i informuar, krahason çmimet online dhe ka më shumë alternativa, përfshirë porositë direkte nga jashtë apo blerjet në outlet-e”.
Moda dhe prakticiteti, preferencat e konsumatorëve shqiptarë në tregun e veshjeve
Sipas operatorëve të tregtimit të veshjeve, stili casual, komod dhe sportiv mbetet ndër më të kërkuarit nga konsumatori vendas duke ofruar prakticitet dhe rehati në jetën e përditshme.
Disa vite më parë, në Tiranë u hap për herë të parë dyqani i veshjeve të markës H&M, të dizenjuara nga kompania e modës suedeze me filiale në shumë shtete të botës, e vlerësuar një nga prodhuesit e veshjeve të modës me çmime të lira.
“Monitor” kontaktoi përfaqësues të stafit të H&M, të cilët pohuan se konsumatori vendas ka më shumë interes për blerje veshjesh të brendshme dhe praktike.
“Në dyqanin tonë në Tiranë, konsumatorët shqiptarë tregojnë interes të lartë për veshjet bazë si çorape, të brendshme, bluza, pantallona dhe hoodies pa logo, produkte të thjeshta, praktike dhe të përdorshme çdo ditë”.
Sipas tyre, shitjet ndryshojnë në varësi të sezonit. “Gjatë vjeshtës dhe dimrit vihet re rritje e kërkesës për veshjet e fëmijëve, për shkak të fillimit të shkollës, si dhe për segmentin e femrave, me nisjen e vitit universitar.
Përveç produkteve bazë, një përqindje e konsiderueshme përbëhet edhe nga artikuj fashion”.
Veshjet e markës “Waikiki” vijojnë të mbeten gjithashtu të kërkuara në vend. Mehmet Memo, menaxher për Shqipërinë i kompanisë “LC WAIKIKI Retail AL Sh.p.k”, pohoi se kërkesa për veshjet në dyqanet e “Waikiki Albania” ka shënuar rritje të lehtë në 2025-n, krahasuar me një vit më parë.
Përveç përmirësimit të ekonomisë dhe turizmit, faktorë të tjerë ndikues pozitiv vlerësohen shtimi i koleksioneve të reja dhe ofertat speciale gjatë vitit, të cilat kanë tërhequr një numër të madh konsumatorësh.
“Aktualisht, artikujt më të kërkuar përfshijnë veshjet e verës si fustanet, këmishët dhe pantallonat e shkurtra.
Të rinjtë dhe gratë janë grupet që blejnë më shumë, por edhe familjet po tregojnë një interes të shtuar. Veshjet për fëmijë dhe aksesorët gjithashtu janë shumë të kërkuara duke reflektuar një trend të përgjithshëm të rritjes së konsumit familjar”.
Ai thekson se konsumatorët shqiptarë po preferojnë trende të modës me ngjyra të gjalla dhe dizajne të rehatshme.
“Veshjet casual dhe sportive janë gjithashtu shumë të kërkuara. Kemi vërejtur një interes të shtuar për veshjet e qëndrueshme dhe ekologjike, si dhe për aksesorët që plotësojnë pamjen e përgjithshme.
Konsumatorët po kërkojnë gjithnjë e më shumë veshje që janë të përshtatshme për aktivitete të ndryshme duke përfshirë punën, argëtimin dhe aktivitetet sportive”.
“Sport Vision Group” vijon të shënojë ecuri të qëndrueshme dhe pozitive në tregun shqiptar, duke konsoliduar pozicionin si lider në segmentin e artikujve sportivë.
Semi Gjyli, menaxhere ekzekutive e kompanisë, tha se ky është rezultat i angazhimit të vazhdueshëm për të qenë pranë konsumatorëve me produkte cilësore, inovative dhe në përputhje me trendet globale.
“Sport Vision Group” është përfaqësues zyrtar në Shqipëri i markës ndërkombëtare “Nike”. Në portofolin e saj përfshihen edhe marka të njohura, si: “The North Face”, “New Balance”, “On Cloud”, “Hoka”, “Asics”, “Champion”, si dhe zotëron të drejtën e shitjes me pakicë për markën “Adidas”.
Këto marka shpërndahen përmes katër koncepteve të konsoliduara: Nike Shop, Sport Vision, Buzz Sneakers Station dhe Sport Reality, përfshirë edhe formatin Nike Outlet dhe Sport Vision Outlet.
Zonja Gjyli thekson se kjo shumëllojshmëri markash dhe formatesh pritet të ndikojë ndjeshëm në rritjen e kërkesës.
“Investimet strategjike në teknologji, përmirësimi i përvojës së konsumatorit dhe rritja e efikasitetit operacional kanë qenë në fokus edhe në gjysmën e parë të 2025-s, duke konfirmuar një trend rritës dhe një aftësi të qartë për t’u përshtatur me dinamikën e tregut”.
Ajo shton se edhe rritja e ndërgjegjësimit për rëndësinë e aktivitetit fizik ka ndikuar ndjeshëm në ecurinë e kërkesës së artikujve sportivë në Shqipëri.
“Rritja e ndërgjegjësimit të konsumatorëve për rëndësinë e një jete aktive dhe sportive nuk përbën vetëm një tendencë globale, por edhe një pasqyrim të drejtpërdrejtë të qasjes proaktive që ‘Sport Vision’ ka ndjekur në tregun vendas.
Nëpërmjet një strategjie marketingu krijuese, fushatave të vazhdueshme dhe bashkëpunimeve të ngushta me komunitetin, kompania ka arritur të ndërtojë një lidhje autentike mes stilit të jetesës së shëndetshme dhe veshjes sportive si simbol i energjisë, stilit personal dhe vetëbesimit.
Ky vizion ka pasur ndikim të dukshëm veçanërisht te të rinjtë, të cilët priren gjithnjë e më shumë të investojnë në atlete dhe veshje sportive që i shërbejnë jo vetëm aktivitetit fizik, por edhe përditshmërisë urbane.
Nga ana tjetër, rritja e ndjeshme e turizmit ka sjellë edhe ndikim pozitiv në kërkesën për produkte të përshtatshme për udhëtime dhe aktivitete në natyrë.
Në këtë mënyrë, ‘Sport Vision Group’ jo vetëm që ka ndjekur me kujdes ndryshimet në sjelljen e konsumatorëve, por është shndërruar vetë në një katalizator të këtyre ndryshimeve duke ndikuar drejtpërdrejt në zhvillimin, zgjerimin dhe diversifikimin e tregut të artikujve sportivë në Shqipëri”.
Kompania “Koan”, nën drejtimin e administratorit Ardian Davidhi, operon në tregun shqiptar si një markë e specializuar në veshje për gjueti dhe ngjitje në mal. Sipas tij, artikujt më të kërkuar aktualisht janë veshjet për hiking, të cilat po pëlqehen gjithnjë e më shumë nga të rinjtë.
Tendenca është në rritje edhe mes turistëve, të cilët tregojnë interes të veçantë për veshje funksionale gjatë eksplorimeve në destinacionet malore më të njohura të vendit, si Thethi dhe Valbona.
Zoti Davidhi pohon se kërkesa në rritje reflekton jo vetëm zhvillimin e turizmit aktiv, por edhe ndërgjegjësimin më të madh për cilësinë dhe funksionalitetin e veshjeve në natyrë.
Si kanë ndryshuar çmimet e veshjeve?
Çmimet e veshjeve kanë shënuar rritje të lehtë gjatë vitit 2025, të ndikuara kryesisht nga inflacioni. Për të përballuar këtë situatë dhe për të ruajtur interesin e konsumatorëve, kompania ka ndërmarrë një sërë masash lehtësuese me oferta dhe zbritje të posaçme.
“Çmimet e veshjeve kanë shënuar rritje të lehtë krahasuar me 2024-n, kryesisht për shkak të inflacionit. Kjo ka ndikuar në mënyrën si blejnë njerëzit, duke i bërë ata më të kujdesshëm në zgjedhjet e tyre.
Megjithatë, ne kemi ofruar një sërë zbritjesh dhe ofertash speciale për të ndihmuar konsumatorët të përballojnë këto ndryshime dhe të vazhdojnë të blejnë produktet tona”, nënvizon Mehmet Memo nga “Waikiki Albania”.
Tendenca e kërkesës së turistëve
Rritja e turizmit, sidomos në zonat bregdetare dhe malore, ka ndikuar pozitivisht në kërkesën për veshje të përshtatshme për aktivitetet turistike dhe stilin e përditshëm të jetesës.
Në këtë kuadër, sektori vazhdon të përshtatet dhe të zhvillohet duke reflektuar një konsum më të ndërgjegjshëm dhe kërkesa të ndryshuara nga klientela lokale dhe turistët e huaj.
Nëse viziton dyqanet e qendrave tregtare në qendër të Tiranës, përballesh me turistë të huaj veçanërisht nga Italia, që blejnë veshje përditshmërie me çmime ekonomike dhe veshje për fëmijë, përfshirë çorape apo tuta sportive.
Në dyqanet e markës OVS, që përfaqëson stilin italian, stafi i shitjeve pohoi se markat PIOMBO janë mjaft të kërkuara nga turistët italianë për shkak të familjarizimit me dizajnin dhe ngjyrat që eksperimentohen për stilin cusual. Në këtë dyqan kërkesë në rritje nga turistët ka edhe për veshjet e fëmijëve.
Edhe stafi i dyqanit të veshjeve të markës “De Facto” thekson se kërkesa nga turistët është në rritje krahasuar me vjet, veçanërisht për veshjet e grave dhe fëmijëve.
Mehmet Memo, menaxher për Shqipërinë i kompanisë “LC Waikiki Retail AL Sh.p.k” pohon se turistët kanë ndikim të madh në shitje gjatë sezonit veror, veçanërisht në dyqanet në qendrën e Tiranës dhe qytetet bregdetare.
“Ka një rritje të dukshme të kërkesës për veshje nga turistët, veçanërisht në qytetet bregdetare si Durrësi dhe Vlora, ku volumi i shitjeve është më i lartë.
Këto qytete janë destinacione të njohura turistike dhe prania e një numri të madh turistësh ka kontribuar në rritjen e shitjeve. Gjithashtu, kemi vërejtur rritje të kërkesës në qytetet e tjera si Tirana dhe Shkodra, të cilat gjithashtu kanë përjetuar rritje të numrit të vizitorëve”.
Megjithëse fluksi i turistëve rritet ndjeshëm në verë, kjo nuk përbën një faktor përcaktues në shitjet totale të dyqaneve të veshjeve luksoze, sipas Era Xhabaftit, zëvendësmenaxhere e përgjithshme e kompanisë “Mini Invest Albania” që tregton markën “Boggi Milano”.
Znj. Xhabafti thekson se kjo vjen për shkak të çmimeve, të cilat nuk janë konkurruese, çka do të joshte turistët për të kryer më tepër blerje.
“Blerjet në sektorin e veshjeve vijojnë të dominohen kryesisht nga konsumatorët vendas. Gjatë sezonit veror vërehet rritje interesi nga turistët, por gjatë pjesës tjetër të vitit, kërkesa nga të huajt është më e kufizuar dhe lidhet kryesisht me ata që ndodhen në Shqipëri për arsye punësimi.
Megjithëse turizmi në vend po njeh zhvillim të vazhdueshëm, ai ende nuk shoqërohet me zakone konsumi të ngjashme me ato në vendet e Bashkimit Europian, ku shopping-u është pjesë e rëndësishme e përvojës turistike.
Në Shqipëri, shumica e turistëve të huaj vijnë për natyrën, bregdetin dhe malet, jo për ofertën e qendrave tregtare, edhe për shkak të mungesës së shumë markave ndërkombëtare të njohura. Ndërkohë, markat e pranishme në treg nuk ofrojnë ndonjë përparësi çmimi krahasuar me vendet e origjinës së turistëve.
Si rezultat, edhe pse gjatë verës dyqanet përjetojnë fluks më të lartë vizitorësh, shopping-u nga turistët nuk përbën ende një faktor vendimtar në ecurinë e përgjithshme të shitjeve në retail-in e veshjeve”.
Të dhënat e operatorëve
Sipas të dhënave të QKB-së, të ardhurat e kompanisë ”ITX Albania” në 2024 u rritën me 10.4% krahasuar me 2023. Fitimet në 2024 u rritën me 25.5% në raport me periudhën paraardhëse.
Për “LC Waikiki Retail Al” të ardhurat në 2024 u rritën me 12% krahasuar me 2023. Fitimet e kompanisë u rritën me 84% në 2024 në raport me periudhën paraardhëse.
Të ardhurat e “In Sport” në 2024 ranë me 3.8% krahasuar me 2023. Kompania shënoi edhe rënie të fitimeve me 16.2% krahasuar me 2023.
Të ardhurat e “Balkan Sport” në 2024 u ulën me 6.2% krahasuar me 2023. Fitimet u ulën 21%.
Në vitin 2024, të ardhurat e kompanisë “New Yorker Albania” u zgjeruan me 11.5% dhe 50.4% krahasuar me vitin 2023.
Në vitin 2024, të ardhurat e “Defacto Retail” u rritën me 6% krahasuar me 2023, ndërsa fitimet e operatorit u rritën me 55.5%.
Të ardhurat e operatorit “KOAN sh.p.k.” në 2024 u rritën me 44%, kurse fitimet ranë 26.7% krahasuar me 2023.
