Turizmi ka shfaqur shenja gjallërimi në muajin gusht, pas një pjesë të parë të vitit që nuk ishte shumë premtuese.
Të dhënat e publikuara nga INSTAT bënë të ditur se në gusht në vend hynë 2.38 milionë shtetas të huaj, me një rritje prej 9.9% në krahasim me të njëjtin muaj të një viti më parë. kjo është norma më e lartë e rritjes që nga janari, ndërsa në korrik, hyrjet e shtetasve të huaj ishin rritur vetëm me 0.39%.
Operatorët kishin pohuar se shtrenjtimi i çmimeve dhe problemet me infrastrukturën po ndikonin negativisht në ecurinë e turizmit në vend.
Megjithatë ata prisnin që gushti të shënonte kulmin e flukseve të turistëve në vend. Pritshmëritë janë pozitive edhe për sezonin e vjeshtës, pasi sezoni turistik po zgjerohet përtej muajve të nxehtë dhe ka shumë turistë që po vijnë përmes tureve kulturore, duke vizituar qytetet të ndryshme të vendit.
Për periudhën janar-gusht në vend kanë hyrë gati 9 milionë shtetas të huaj, duke u rrit me 5.2% me bazë vjetore. Ritmi është ngadalësuar ndjeshëm në krahasim me vitin e mëparshëm, kur për të njëjtën periudhë zgjerimi ishte 18.6%.
Edhe daljet e shqiptarëve jashtë vendit janë rritur. Sipas INSTAT, gati 1 milionë shtetas shqiptarë dolën nga vendi, me një rritje prej rreth 10%. Shtetasit shqiptarë kanë preferuar këtë vit për pushime shtetet fqinjë, kryesisht Greqinë, pas shtrenjtimit të turizmit në vend.
INSTAT raportoi se gjatë muajit Gusht 2025, rezultojnë të kenë hyrë, në territorin e Republikës së Shqipërisë, 3.368.104 shtetas shqiptarë dhe të huaj. Ky tregues ka pësuar një rritje me 8,4 %, krahasuar me Gusht 2024.
3.335.824 shtetas shqiptarë dhe të huaj rezultojnë të kenë dalë nga territori i Republikës së Shqipërisë, duke shënuar një rritje me 12,1 %, krahasuar me të njëjtën periudhë të një viti më parë.
Në Gusht 2025, numri i shtetasve shqiptarë që kanë hyrë në territorin shqiptar është 986.240, duke pësuar një rritje me 5,1 %, krahasuar me Gusht 2024.
Numri i shtetasve të huaj që kanë hyrë në territorin shqiptar është 2.381.864. Ky numër është rritur me 9,9 %, krahasuar me të njëjtën periudhë të vitit 2024.
Në muajin Gusht 2025, 994.573 shtetas shqiptarë numërohen të kenë dalë nga territori i Shqipërisë, duke shënuar rritje me 10,3 %, krahasuar me Gusht 2024.
Daljet e shtetasve të huaj nga territori i Shqipërisë gjatë muajit Gusht 2025, janë 2.341.251. Krahasuar me të njëjtën periudhë të një viti më parë, ky tregues është rritur me 12,8 %.
Në Gusht 2025, 97 % e hyrjeve të shtetasve të huaj në Shqipëri janë nga rajoni i Evropës.
Evropa Jugore zë 77 % të hyrjeve të shtetasve të huaj nga kontinenti Evropian, ndjekur nga Evropa Perëndimore me 9 % dhe Europa Qendrore / Lindore me 8 %.
Qëllimi i hyrjes në territorin shqiptar i shtetasve të huaj, në 99 % të rasteve është për qëllime personale. Në Gusht 2025, ky tregues ka shënuar një rritje me 9,8 %, krahasuar me Gusht 2024.
Hyrjet e shtetasve të huaj për qëllime Biznesi dhe profesionale janë rritur me 23,3 %./Monitor
