Teksa propaganda e qeverisë bën jehonë për numrin e lartë të turistëve dhe bukuritë natyrore të Shqipërisë, raportet shtetërore tregojnë një realitet krejt të kundërt. Shqipëria ka ende plazhe të kategorisë së keqe, për të cilat kërkohet marrja e masave të menjëhershme.
Plazhet me cilësi jo të mirë, që i përkasin kategorisë D – cilësi e keqe/masa të menjëhershme – janë Velipojë, Durrësi, Kavajë, Qerret, Spille, Vlorë, Himarë, Qeparo, Sarandë, Ksamil dhe Lin–Pogradec. Kjo ndodh për shkak se në plazhet shqiptare derdhen ujëra të ndotura urbane.
“Për përmirësimin e cilësisë të plazheve të ndotura kërkohet marrja e masave për trajtimin e ujërave të ndotura urbane përpara derdhjes në ujërat pritëse, si shkaktari kryesor i ndotjes së tyre”, thuhet në raportin e Agjencisë Kombëtare të Mjedisit.
Instituti i Shëndetit Publik, së bashku me Agjencinë Kombëtare të Mjedisit, ka kryer monitorimin dhe vlerësimin e cilësisë së ujërave bregdetare të larjes gjatë sezonit turistik 2024.
Burimet e ndotjes së ujërave të larjes janë numri i lartë i pushuesve, sidomos në pikun e sezonit por edhe gjatë muajit shtator, derdhja e ujërave sipërfaqësore dhe shkarkimet e ujërave urbane të patrajtuara në ujërat pritëse bregdetare në mënyrë direkte dhe indirekte, si dhe prania e mbetjeve urbane inerte.
Ndotja e ujërave bregdetare ka ndikim të drejtpërdrejtë në mjedis, duke konsistuar në prishjen e ekosistemeve, eutrofikimin dhe dëmtimin e akuakulturës.
