Barriera e Madhe Koralore në Australi ka regjistruar vitin e kaluar humbjen më të madhe vjetore të koraleve të gjalla që prej fillimit të matjeve, 39 vjet më parë. Sipas të dhënave zyrtare, mbulesa e koraleve është tkurrur me pothuajse një të tretën në rajonin jugor brenda një viti, me një të katërtën në veri dhe me 14% në zonën qendrore. Shkaku kryesor i këtij fenomeni lidhet me ndryshimet klimatike dhe temperaturat rekord të regjistruara gjatë dy viteve të fundit. Ekspertët shpjegojnë se koralet kanë vështirësi të mbijetojnë në ujëra të nxehta për periudha të gjata kohore. Kur temperaturat e larta zgjasin disa javë, ndodh procesi i “zbardhjes” së koraleve – një gjendje kur ato humbin algat që jetojnë në inde dhe u japin ngjyrë, duke i bërë më të rrezikuara për mbijetesë.
Shkëmbinjtë koralorë konsiderohen si një ekosistem unik dhe njëkohësisht i kërcënuar nga ngrohja globale, duke qenë veçanërisht të ndjeshëm ndaj rritjes së temperaturave të ujërave oqeanike. Ndërkohë, sipas të dhënave më të fundit nga Shërbimi Klimatik Copernicus i Bashkimit Europian, muaji korrik i këtij viti nuk theu rekordin e temperaturave të dy viteve të mëparshme, por mbetet i treti më i nxehtë i regjistruar ndonjëherë, me një mesatare globale prej 16.68°C. Ky fakt tregon se, pavarësisht lehtësimit të lehtë të temperaturave krahasuar me vitet e kaluara, rreziku për ekosistemet detare dhe Barrierën e Madhe Koralore mbetet i lartë.
