Autoritetet shëndetësore në Greqi janë vënë në alarm pas zbulimit se një dhurues danez sperme lidhet me dhjetëra raste kanceri tek fëmijë të lindur përmes fekondimit artificial. Sipas të dhënave zyrtare, nga materiali gjenetik i këtij dhuruesi kanë lindur gjithsej 18 fëmijë në Greqi, disa prej tyre brenda të njëjtave familje, duke tejkaluar kufijtë e lejuar me ligj.
Një mjek ka deklaruar për mediat greke se një fëmijë i moshës 5–10 vjeç ka humbur jetën së fundmi nga kanceri. Ai ishte pjesë e një familjeje me tre fëmijë, të gjithë të lindur nga i njëjti dhurues. Tragjedia vijon, pasi edhe një tjetër fëmijë i së njëjtës familje është diagnostikuar me kancer dhe po i nënshtrohet trajtimit, ndërsa mjekët shprehen pak optimistë për gjendjen e tij shëndetësore.
Pas analizave të specializuara shkencore, autoritetet greke kanë konstatuar se fëmijët mbartnin një mutacion shumë të rrallë në gjenin TP53, i cili rrit ndjeshëm rrezikun për forma agresive të kancerit në moshë të vogël. Mutacioni nuk ishte zbuluar gjatë kontrolleve fillestare të dhuruesit, pasi rezulton të ketë qenë i pranishëm vetëm në një pjesë të spermatozoideve të tij.
Rasti nuk kufizohet vetëm në Greqi. Në të gjithë Europën, i njëjti dhurues danez dyshohet se ka sjellë në jetë të paktën 197 fëmijë në 14 vende të ndryshme, përmes dhjetëra klinikave të fertilitetit. Deri tani, 77 fëmijë janë testuar dhe 25 prej tyre rezultojnë mbartës të mutacionit, ndërsa disa kanë ndërruar jetë në moshë shumë të hershme.
Ekspertët flasin për një dështim serioz të sistemit të kontrollit, duke theksuar mungesën e koordinimit mes vendeve të Bashkimit Europian, ligje të ndryshme për kufirin e dhurimeve dhe një industri shumë fitimprurëse të fertilitetit, por me mbikëqyrje të pamjaftueshme.
