Sezoni i këtij viti ka qenë veçanërisht sfidues për fermerët e Myzeqesë, të cilët përballen me rendimente të ulëta të misrit, të ndikuara drejtpërdrejt nga thatësira e zgjatur dhe mungesa e sistemit të vaditjes.
Megjithëse misri u mboll në sipërfaqe të konsiderueshme, korrja që ka nisur prej disa ditësh po tregon se prodhimi është shumë më i ulët krahasuar me sezonet e mëparshme. Dëmet më të mëdha janë regjistruar në zonat ku mungon ujitja, veçanërisht në fshatrat e Patosit, ku tharja e rezervuarit të Kurjanit ka lënë toka të tëra pa ujë.
Soni Semanjaku, fermer nga fshati Sheqishtë, tregon se ka mbjellë 8 hektarë me misër, por rezultati ka qenë zhgënjyes: “Kemi punuar me shpresën për një prodhim të mirë, por mungesa e ujit na ka dëmtuar rëndë.”
Ndërkohë, fermerë të tjerë, si një banor nga fshati Belinë, kanë zgjedhur të mos rrezikojnë me kultura që kërkojnë vaditje intensive. Ai ka mbjellë elb dhe grurë, të cilat janë më rezistente ndaj thatësirës.
Në territorin e bashkisë së Patosit mungojnë rezervuarë aktivë për furnizimin e sistemit vaditës. I vetmi burim – rezervuari i Kurjanit në Rroskovec – është tharë për shkak të kushteve ekstreme të motit këtë sezon. Edhe pse lumi Seman ndodhet pranë, ai nuk mund të përdoret për ujitje për shkak të disnivelit mes lumit dhe tokave bujqësore.
Ndikimi i thatësirës është ndjerë në gjithë qarkun e Fierit, përfshirë edhe zonat ku, në kushte normale, 80% e tokave ujiten rregullisht. Drejtoria e Bujqësisë ende nuk ka publikuar të dhënat zyrtare për rendimentin e këtij viti, por parashikimet tregojnë një ulje të dukshme krahasuar me vitin e kaluar.
Megjithatë, një dritë jeshile për fermerët është rritja e çmimit të misrit, i cili mund të zbusë disi humbjet nga prodhimi i dobët.
