Shoqata e të Verbërve ka zhvilluar sot një protestë, në kuadër të Ditës Ndërkombëtare të Shkopit të Bardhë, duke ngritur zërin për kushtet e vështira me të cilat përballet prej vitesh ky komunitet.
Sipas përfaqësuesve të shoqatës, prej më shumë se një dekade të verbërit vuajnë mungesën e mbështetjes nga institucionet shtetërore, çka ka çuar në përjashtimin e shumë prej tyre nga mundësitë e barabarta për arsimim, punësim dhe një jetë të pavarur.
“Në vitin 2009 është hera e fundit që është rritur asistenca për personat e verbër,” thuhet në letrën e kërkesës drejtuar qeverisë.
Shoqata i bën thirrje ekzekutivit të ndërhyjë urgjentisht për:
Rikthimin e shërbimeve publike të dedikuara për personat e verbër;
Rritjen e asistencës ekonomike;
Mundësimin e integrimit në tregun e punës, të paktën me pagë minimale.
Protestuesit theksuan se mungesa e politikave mbështetëse po i detyron shumë persona të jetojnë në izolim, duke i mohuar dinjitetin dhe të drejtën për një jetë të barabartë me pjesën tjetër të shoqërisë.
