Shkencëtarët në Japoni kanë ofruar për herë të parë prova biologjike konkrete se mjegulla e trurit e shkaktuar nga COVID-i afatgjatë nuk është thjesht një simptomë subjektive, por një gjendje e matshme molekulare e trurit.
Ekipi kërkimor nga Universiteti i Qytetit të Yokohama-s, i udhëhequr nga Profesor Takuya Takahashi, ka zbuluar se pacientët që vuajnë nga COVID-19 i zgjatur shfaqin aktivitet të shtuar të receptorëve AMPA – molekula kyçe që mundësojnë komunikimin mes qelizave nervore dhe janë të rëndësishme për kujtesën dhe të nxënit.
“Duke përdorur teknologjinë tonë të re PET për imazherinë e receptorëve AMPA, synojmë të sjellim një perspektivë të re për zgjidhjen e një sfide serioze shëndetësore siç është COVID-i afatgjatë”, tha Profesor Takahashi.
Çfarë tregoi studimi?
Studiuesit skanuan trurin e 30 pacientëve me COVID të zgjatur dhe i krahasuan me 80 persona të shëndetshëm. Rezultatet treguan se:
Dendësia e receptorëve AMPA ishte dukshëm më e lartë te pacientët me simptomën e mjegullës së trurit;
Sa më i lartë të ishte aktiviteti i receptorëve, aq më të rënda ishin problemet njohëse si harresa, ngadalësimi i të menduarit dhe vështirësitë në përqendrim;
Nivelet e larta të inflamacionit në trup shoqëroheshin po ashtu me rritjen e aktivitetit të receptorëve, duke sugjeruar rol të rëndësishëm të reagimit imunitar të trurit.
Çfarë është mjegulla e trurit?
Mjegulla e trurit është një grup simptomash që përfshijnë vështirësi në përqendrim, humbje të kujtesës dhe mendim të ngadalësuar. Ajo prek mbi 80% të personave që vuajnë nga COVID-i i zgjatur dhe ka kufizuar aftësinë e miliona njerëzve për të punuar ose për të kryer aktivitete të përditshme.
Çfarë pritet më pas?
Autorët e studimit theksojnë se rezultatet duhet të shërbejnë si sinjal për sistemet shëndetësore që ta trajtojnë mjegullën e trurit si një çrregullim klinik më vete. Gjetjet mund të hapin rrugën për terapi të reja që synojnë uljen e aktivitetit të tepërt të receptorëve AMPA, duke lehtësuar simptomat e të prekurve.
