Edhe pse pandemia e Covid-19 është lënë pas dhe jeta është rikthyer kryesisht në normalitet, pasojat e virusit vazhdojnë të ndihen për miliona njerëz në mbarë botën. Ndërsa vaksinat ndihmuan në shpëtimin e jetëve dhe në mbylljen e emergjencës globale, shumë persona u përballën me forma të rënda të sëmundjes ose humbën jetën para se trajtimet dhe vaksinat të bëheshin të aksesueshme.
Sot, Covid-19 nuk monitorohet më me përditësime të përditshme, por virusi vazhdon të qarkullojë dhe të pësojë mutacione. Shqetësimi më i madh mbetet te pacientët me “Covid të gjatë”, të cilët vuajnë për muaj apo vite nga simptoma si lodhje ekstreme, mjegull në tru dhe probleme me frymëmarrjen.
Një studim i ri i udhëhequr nga Universiteti i Kalifornisë (UCLA) ka hedhur dritë mbi një mekanizëm të mundshëm pas këtyre simptomave. Sipas kërkimit, pasi sistemi imunitar shkatërron virusin, fragmente të vogla proteinash të SARS-CoV-2 mund të mbeten në organizëm. Disa prej këtyre fragmenteve janë në gjendje të sulmojnë qelizat e sistemit imunitar duke hapur vrima në membranat e tyre dhe duke i shkatërruar.
Studiuesit zbuluan se këto fragmente mund të synojnë qeliza të caktuara bazuar në formën e tyre, veçanërisht qelizat me struktura me zgjatime, si disa qeliza T dhe qeliza mbrojtëse të tjera të rëndësishme për luftimin e infeksioneve. Ky mekanizëm mund të shpjegojë pse në disa raste Covid-19 dobëson fort sistemin imunitar dhe pse simptomat mund të zgjasin edhe pasi infeksioni aktiv ka kaluar.
Studiuesit më herët i kanë përshkruar këto mbetje si fragmente “zombi”, pasi ato mund të imitojnë molekulat e vetë sistemit imunitar dhe të nxisin inflamacion të vazhdueshëm.
Këto gjetje përputhen edhe me studime të tjera që tregojnë se gjurmë të virusit ose fragmente proteinash mund të qëndrojnë në trup për një kohë të gjatë, duke nxitur inflamacion dhe simptoma të zgjatura te disa pacientë me Covid të gjatë.
Ekspertët theksojnë se mekanizmat e Covid-it të gjatë janë ende kompleksë dhe jo plotësisht të kuptuar, por zbulime të tilla mund të ndihmojnë në zhvillimin e trajtimeve të reja për pacientët që vazhdojnë të vuajnë nga pasojat afatgjata të virusit.
