Një ngarkesë me speca të kuq të eksportuar nga Shqipëria është tërhequr me urgjencë nga tregu slloven, pasi analizat laboratorike kanë zbuluar nivele të larta të pesticideve të rrezikshme për shëndetin e konsumatorëve.
Sipas autoriteteve sllovene, specat përmbanin pesticide si acetamiprid, formetanate dhe flonicamid, të cilat tejkalonin kufijtë e lejuar. Produkti ishte importuar në Slloveni gjatë periudhës 24 gusht – 4 shtator dhe ishte shpërndarë në kuti kartoni dhe plastike. Kompania Geaprodukt, që ka importuar specat nga Shqipëria, ka dhënë urdhër për tërheqjen e menjëhershme të tyre nga tregu dhe ka këshilluar klientët që të kthejnë produktin në vendin e blerjes. Në rast se kjo nuk është e mundur, ata duhet ta asgjësojnë vetë me kujdes.
Po ashtu, kompania ka paralajmëruar konsumatorët që mund të kenë konsumuar ose pasur kontakt me specat që të lajnë mirë duart dhe, nëse ndiejnë shqetësime të tretjes ose të përziera, të kërkojnë menjëherë ndihmë mjekësore. Eksportet bujqësore nga Shqipëria drejt vendeve të Bashkimit Europian po përballen gjithnjë e më shumë me kontrolle të rrepta për përmbajtjen e mbetjeve kimike dhe metaleve të rënda në produktet ushqimore.
Disa ditë më parë, autoritetet sllovene bllokuan gjithashtu një sasi prej 5.562 kg pjeshkë me origjinë nga Shqipëria për shkak të nivelit të lartë të nikelit, i cili tejkalonte normat e lejuara nga BE. Ky rast u raportua më 22 gusht 2025 nëpërmjet Sistemit të Alertimit të Shpejtë për Ushqimin dhe Ushqimin për Kafshët (RASFF), duke njoftuar Autoritetin Kombëtar të Ushqimit në Shqipëri. Sipas AKU-së, pjeshkët nuk kanë hyrë në tregun vendas, pasi ishin destinuar ekskluzivisht për eksport, dhe sasia u asgjësua menjëherë në Kroaci pas konfirmimit të analizave laboratorike.
