Sot pasdite dhe nesër moti sjell reshje të dendura shiu, kryesisht në veri dhe jug të vendit. Qarqet Shkodër, Kukës, Lezhë, Vlorë dhe Gjirokastër janë zonat më të rrezikuara, ku mund të ketë vërshime të shpejta të lumenjve malorë dhe rrëshqitje dherash.
Në zonat urbane të këtyre qarqeve mund të shfaqen edhe përmbytje të lokalizuara, sidomos aty ku kanalizimet nuk janë në gjendje të mirë.
Sipas të dhënave të IGJEO-s, reshjet e shumta të ditëve të fundit – që pritet të vazhdojnë deri të enjten, më 8 janar – do të sjellin rritje të ndjeshme të niveleve të ujit në disa lumenj kryesorë, si: Drin–Buna, Liqeni i Shkodrës, Lumi Mat, Shkumbin, Vjosë.
Rreziku më i lartë për përmbytje mbetet në zonën e Drin-Bunës dhe Liqenin e Shkodrës, veçanërisht gjatë ditës së sotme dhe nesër.
Moti
Reshje intensive deri shumë intensive priten në Shkodër, Kukës, Vlorë dhe Gjirokastër
Reshje mesatare deri intensive në Lezhë, Berat dhe Korçë
Zona të tjera me reshje të dobëta deri mesatare
Shiu do të shoqërohet me shtrëngata
Temperaturat për nesër (dt. 06):
Bregdeti: 13 – 17°C
Zonat e ulëta: 12 – 17°C
Zonat malore: 5 – 11°C
Era do të jetë mesatare deri e fortë, kryesisht në bregdet dhe në veri.
