Sot shënohet 34-vjetori i një prej ngjarjeve më të mëdha dhe më dramatike të emigracionit shqiptar: eksodi masiv drejt Italisë përmes Anijes “Vlora”, e cila më 8 gusht 1991 mbërriti në portin e Barit me mbi 20 mijë shqiptarë në bord.
Pas dekadash izolimi nën regjimin komunist, shqiptarët u përballën me realitetin e një vendi të rrënuar ekonomikisht dhe socialisht. Në përpjekje për të gjetur një jetë më të mirë, mijëra qytetarë hipën në mënyrë kaotike në anijen tregtare “Vlora” në Durrës, e cila u nis drejt Italisë, duke shënuar njërin prej kapitujve më të rëndësishëm të historisë së emigracionit shqiptar.
Pamjet e asaj dite janë bërë ikonike: njerëz të ngjitur në çdo pjesë të anijes, deri në majë të shtizës së flamurit. Pas mbërritjes në Itali, emigrantët u grumbulluan në stadiumin “Della Vittoria” në Bari, ku qëndruan për disa ditë në kushte të vështira, ndërsa ushqimi u dërgohej me helikopterë.
Pavarësisht se pjesa më e madhe e tyre u riatdhesua brenda dy javësh (rreth 17,400 vetë), rreth 1,500 shqiptarë mbetën në Itali pasi kërkuan strehim politik.
Eksodi i 8 gushtit 1991 mbetet një moment historik që simbolizon jo vetëm dramën e një populli në kërkim të lirisë dhe dinjitetit, por edhe fillimin e një epoke të re për emigracionin shqiptar në Evropë.
