Në Britani është ngritur alarmi pasi sperma e një donatori me gjen të lidhur me rrezikun e lartë për kancer është përdorur për të ngjizur afro 200 fëmijë nëpërmjet procesit in vitro. Në këtë rrjet shpërndarjeje përfshihet edhe Shqipëria, por Ministria e Shëndetësisë në vendin tonë nuk ka dhënë asnjë informacion lidhur me këtë skandal.
Në Shqipëri, pothuajse të gjitha klinikat private kryejnë procedurat in vitro duke përdorur spermë donatorësh. Megjithatë, Ministria e Shëndetësisë nuk ushtron kontroll të rregullt mbi to dhe nuk ofron transparencë se si funksionojnë këto klinika, sa standarde respektojnë dhe çfarë sigurie u ofrohet qytetarëve.
Sipas BBC, Banka Evropiane e Spermës në Danimarkë, e cila ka shpërndarë materialin biologjik në disa vende europiane, ka shprehur “ngushëllimet më të thella” për familjet e prekura dhe ka pranuar se sperma është përdorur për lindjen e shumë foshnjave në disa vende.
Ndërkohë që Ministria e Shëndetësisë bashkëpunon me spitalet private në fusha të tjera, si transplantet, ajo vijon të mos japë garanci dhe të mos informojë publikun mbi sigurinë e procedurave in vitro, duke lënë në pasiguri qindra qytetarë që kërkojnë trajtim në klinikat private.
