Evropa vazhdon të jetë një nga rajonet më të pasura në botë, por sot pasuria e një vendi nuk matet vetëm me sa prodhon ekonomia e tij.
Sipas analizës së platformës financiare HelloSafe, një vend konsiderohet “i pasur” jo vetëm nga të ardhurat e larta, por edhe nga mënyra si jetojnë qytetarët. Në këtë renditje për vitin 2026, Norvegjia renditet e para në botë.
Raporti thekson se treguesi GDP për banor nuk mjafton për të kuptuar realitetin, sepse nuk tregon nëse pasuria ndahet në mënyrë të drejtë mes njerëzve. Një vend mund të ketë shifra shumë të larta ekonomike, por kjo nuk do të thotë domosdoshmërisht që qytetarët jetojnë mirë.
Një shembull i qartë është Irlanda. Ajo ka një GDP shumë të lartë për banor, por kjo ndikohet shumë nga prania e kompanive të mëdha ndërkombëtare.
HelloSafe ka krijuar një “Indeks të Prosperitetit”, i cili kombinon disa faktorë: të ardhurat mesatare, nivelin e pabarazisë dhe treguesit socialë si shëndetësia dhe cilësia e jetesës. Qëllimi është të matet jo vetëm pasuria, por edhe mirëqenia reale e njerëzve.
Në këtë indeks, vendet europiane dominojnë renditjen. Norvegjia zë vendin e parë falë të ardhurave të larta dhe një sistemi shumë të balancuar social. Pas saj renditen Irlanda dhe Luksemburgu, të cilat gjithashtu kanë ekonomi të forta dhe standard të lartë jetese.
Në top-listë përfshihen edhe vende si Islanda, e cila vlerësohet për zhvillim njerëzor dhe nivel të ulët varfërie, si dhe Singapori, i cili ka të ardhura shumë të larta por ndikohet nga pabarazia më e madhe sociale.
Ndërkohë, Shtetet e Bashkuara renditen më poshtë në krahasim me Evropën, kryesisht për shkak të pabarazisë më të lartë
Raporti tregon gjithashtu se vende si Franca, Italia dhe Spanja kanë pozita më të mesme, për shkak të të ardhurave më të ulëta ose sfidave sociale, ndërsa disa vende të Evropës Lindore kanë rezultate më të dobëta në krahasim me Perëndimin.
Në përfundim, analiza thekson se sot koncepti i “vendit të pasur” ka ndryshuar. Nuk mjafton vetëm prodhimi ekonomik, por është po aq e rëndësishme se si shpërndahet pasuria dhe sa mirë jetojnë qytetarët në realitetin e përditshëm.
