“I jemi borxhlinj Italisë për shkak të historisë”, u shpreh Kryeministri Rama më 15 tetor 2024, kur shpalli lajmin se në Gjadër do të ngrihej një kamp pritës refugjatësh, një kamp që prodhoi polemika të forta, sidomos në Itali.
Por me siguri të plotë kreu i qeverisë deklaronte se nuk do të kishte kampe të tjera… por nuk rezulton kështu!
Prej ditës së djeshme u deklarua se për 24 muajt e ardhshëm Shqipëria po parashikon ngritjen e 20 qendrave pritëse për emigrantët nga Afganistani, Pakistani, Irani, Siria, Libani dhe Gaza.
Prej këtyre qendrave, rrugët përmes vendit tonë do t’i kalojnë më pas drejt vendeve si Serbia apo Greqia. Nëse qendra e parë u vendos në Gjadër, tashmë këto qendra të reja do të vendosen në jug të Shqipërisë. Korça, Gjirokastra dhe Vlora do të jenë vendet pritëse për këta emigrantë.
Ngritja e tyre do të jetë në përmasa me kapacitete që variojnë nga 100 deri në 410 shtretër. Plani bazohet në projektvendimin “Për miratimin e Planit Kombëtar të Kontigjencës për flukset e përziera migratore 2026–2028”.
Projektvendimi është miratuar në mbledhjen e fundit të Këshillit Konsultativ të Agjencisë për Mbështetjen e Vetëqeverisjes Vendore (AMVV), që funksionon si institucion në varësi të ministrit Ervin Demo.
Jo pak raste, nëse lëviz në këto qarqe, hasesh me emigrantë nga Afrika dhe Azia, të cilët enden dhe janë pre e trafikantëve që premtojnë t’i kalojnë drejt doganave evropiane, por që i braktisin rrugëve sapo hasen me policinë.
Plani i parashikuar për ngritjen e kapaciteteve pritëse emergjente për menaxhimin e flukseve migratore mbështetet mbi një shpërndarje të balancuar. Këto qendra synojnë të shfrytëzojnë infrastrukturën ekzistuese publike, hapësirat e braktisura apo truallin e lirë, duke garantuar reagim të shpejtë dhe funksional në rast të flukseve të papritura migratore, sipas raportit të publikuar deri më tani.
Në qarkun e Korçës parashikohet ngritja e disa strukturave të akomodimit emergjent. Në këtë qark është parashikuar fshati Floq në Njësinë Administrative Mollaj.
Në Pogradec po shihen mundësi për ngritjen e qendrave me kapacitet të konsiderueshëm.
Në Devoll, hapësirat e qytetit të Bilishtit dhe të fshatit Bitinckë ofrojnë gjithsej mbi 11.500 m², duke e bërë këtë bashki një nyje të rëndësishme pritjeje.
Por nuk do të kursehet as qarku i Vlorës. Janë identifikuar disa hapësira kryesore si konviktet e “Qytetit të Studentit” dhe të Shkollës Industriale, si dhe objekte që mund të përshtaten për akomodim, si Pallati i Sportit “Flamurtari”, Shkolla e Marinës dhe zyrat e Njësisë Administrative Novoselë.
Ende ka pikëpyetje dhe skepticizëm për ngritjen e këtyre kampeve, së pari sepse të dhënat janë ende të pakta, por edhe mbi faktin që kampi i Gjadrit dështoi, ndërkohë që nuk dihet se si këto kampe do të funksionojnë. Denada Jushi/ acqj.al
