Gjatë 24 orëve të fundit, në Shqipëri janë evidentuar 50 vatra zjarri, nga të cilat 19 mbeten ende aktive dhe po shkaktojnë shqetësim në disa qarqe.
Situata paraqitet kritike në Vlorë, ku zjarri vazhdon pranë Parkut Natyror të Syrit të Kaltër, me ndërhyrje të fuqishme të Forcave të Armatosura dhe mjeteve ajrore ndërkombëtare, përfshirë helikopterë Black Hawk dhe avionë Canadair. Po ashtu, vatra aktive shfaqen në qarqet Berat, Tiranë, Dibër, Durrës, Gjirokastër, Elbasan, Shkodër, Kukës dhe Korçë.
Banorët e disa zonave si Poliçani dhe Rrogozhina janë evakuuar për shkak të përhapjes së flakëve pranë banesave. Autoritetet vijojnë operacionet e shuarjes me mbi 1080 forca operacionale dhe 82 mjete zjarrfikëse, të mbështetura nga helikopterë dhe avionë nga Shqipëria, Emiratet e Bashkuara Arabe, Kroacia, Sllovakia, Republika Çeke dhe Greqia.
Sipas Institutit të Gjeoshkencave, Energjisë, Ujit dhe Mjedisit (IGJEO), për sot nuk priten reshje dhe niveli i rrezikut në pyje mbetet “i lartë” në të gjitha qarqet, me zona me rrezik “shumë të lartë” në Shkodër Jug, Lezhë Veri dhe Elbasan Perëndim.
Temperaturat do të arrijnë deri në 41°C, duke kërkuar nga qytetarët maksimal kujdes dhe bashkëpunim për të raportuar çdo vatër zjarri pranë autoriteteve.
