Në vitin 2024, në BE ishin gjithsej 737.142 autobusë dhe autobusë motorikë (përfshirë trolejbuse dhe minibuse), që përfaqësonin 1,6 autobusë për 1.000 banorë. Maqedonia e Veriut, me 3.690 autobusë ose 2 autobusë për 1.000 banorë, është pak më e lartë se mesatarja evropiane.
Numri më i lartë i autobusëve dhe autobusëve motorikë për 1.000 njerëz është regjistruar në Maltë (4,6), e pasuar nga Luksemburgu (4,0) dhe Estonia (3,7). Në anën tjetër, shkallët më të ulëta janë regjistruar në Holandë (0,5), Gjermani (1,0) dhe Austria (1,2), sipas të dhënave për pajisjet e transportit të publikuara nga Eurostat.
Në rajon, më së shumti autobuza për 1.000 banorë ka Shqipëria (3,8), Rumani (3) dhe Bullgari (2,8). Pas tyre vijnë Mal i Zi (2,4), Greqia (2,6), Serbia (1,8), Kroacia (1,5) dhe Bosnja dhe Hercegovina.
Kjo shkallë motorizimi ka mbetur e qëndrueshme gjatë 10 viteve të fundit, ndërkohë që numri i makinave private për 1.000 banorë është rritur ndjeshëm gjatë kësaj periudhe (nga 506 në 2014 në 578 në 2024). Republika e Maqedonisë së Veriut, me 319 makina për 1.000 banorë, mbetet nën mesataren evropiane, megjithatë ka pasur një rritje të konsiderueshme në 10 vitet e fundit, nga 180 në vitin 2014.
Në mesatare, 5,1 për qind e flotës së autobusëve dhe autobusëve motorikë u rinovua në të gjithë BE-në në vitin 2024, ndërsa Maqedonia, me 379 autobuza të rinj në vitin 2024, ka një shkallë rinovimi prej 10,2 për qind.
Shkalla e rinovimit përfaqëson raportin e automjeteve të regjistruara për herë të parë në të gjithë flotën, përjashtuar ato të përdorura. Në BE, shkalla më e lartë e rinovimit ishte në Luksemburg (11,6 për qind), pasuar nga Holanda (9,6 për qind) dhe Austria (9,5 për qind). Nga ana tjetër, vetëm 0,7 për qind e flotës në vitin 2024 u rinovua në Bullgari, 2,4 për qind në Poloni dhe 2,5 për qind në Hungari.
Përpjekjet për të përmirësuar cilësinë e ajrit, veçanërisht në zonat urbane, kanë pasur një ndikim pozitiv në pjesën e autobusëve dhe autobusëve motorikë me emisione zero, duke përfaqësuar një pjesë më të madhe të regjistrimeve të reja të automjeteve. Në nivelin e BE-së, në vitin 2024, kjo pjesë ishte më e lartë se ajo e automjeteve të reja private (17,8 për qind kundrejt 13,5 për qind), që përkon me 6.746 autobuza të rinj me emisione zero.
Në vendin tonë, sipas të dhënave nga Instituti i Statistikës, në vitin 2024 nga 3.690 autobuza, 3.609 ishin me motorë nafte (97,8 për qind), 63 me benzinë-gaz (1,7 për qind) dhe vetëm 15 ishin elektrike (0,4 për qind)./TRT Balkan
