Shtetet e Bashkuara të Amerikës kanë ofruar asistencë të specializuar për Gardën e Republikës, strukturën që siguron mbrojtjen e zyrtarëve të lartë në Shqipëri.
Në një njoftim zyrtar, Ambasada e SHBA në Tiranë bëri të ditur se tetë anëtarë të Gardës, të angazhuar në sigurinë e zyrtarëve qeveritarë dhe prokurorëve të SPAK, kanë përfunduar një trajnim taktik të nivelit të lartë nga Shërbimi Sekret amerikan. Trajnimi u zhvillua në Akademinë Ndërkombëtare të Zbatimit të Ligjit të SHBA në Budapest.
Ambasada thekson gjithashtu se SHBA vijon të mbështesë institucionet shqiptare duke ofruar pajisje taktike dhe programe të rregullta trajnimi për forcat që mbrojnë zyrtarët e drejtësisë.
“Jemi krenarë të punojmë me individët e guximshëm që mbajnë të sigurt drejtuesit e sistemit të drejtësisë në Shqipëri”, thuhet në njoftim.
