Udhëtimet brenda vendeve të Ballkanit Perëndimor mbeten një praktikë e zakonshme për qytetarët e rajonit, sipas të dhënave të publikuara nga Balkan Barometer 2025. Anketa tregon se shumica dërrmuese e të anketuarve kanë udhëtuar të paktën një herë drejt ekonomive të rajonit gjatë 12 muajve të fundit, duke reflektuar lidhje të forta ekonomike, sociale dhe kulturore mes vendeve fqinje.
Shqipëria renditet ndër vendet me nivelin më të lartë të lëvizshmërisë, ku 88% e të anketuarve deklarojnë se kanë udhëtuar një herë ose disa herë brenda Ballkanit Perëndimor gjatë vitit të fundit. Një pjesë e vogël, rreth 6%, raportojnë se kanë udhëtuar 4–10 herë, ndërsa 5% kanë kryer më shumë se 10 udhëtime, çka tregon një nivel të konsiderueshëm qarkullimi, sidomos për arsye pune, biznesi apo lidhjesh familjare.
Në nivel rajonal, mesatarja tregon se 84% e qytetarëve kanë udhëtuar të paktën një herë, ndërsa një përqindje më e vogël raportojnë udhëtime më të shpeshta. Kosova shënon përqindjen më të lartë të qytetarëve që kanë udhëtuar të paktën një herë, me 93%, e ndjekur nga Shqipëria dhe Serbia. Në të kundërt, Maqedonia e Veriut (78%) dhe Mali i Zi (76%) regjistrojnë nivele disi më të ulëta, por sërish mbeten mbi pragun e tre të katërtave të popullsisë.
Të dhënat tregojnë gjithashtu se udhëtimet e shpeshta, mbi katër herë në vit, janë më të zakonshme në vende si Bosnje-Hercegovina dhe Mali i Zi, ku një pjesë më e madhe e qytetarëve raportojnë lëvizje të vazhdueshme brenda rajonit. Ndërkohë, përqindja e atyre që nuk kanë udhëtuar ose kanë refuzuar të përgjigjen mbetet minimale në të gjitha vendet.
Në tërësi, këto shifra konfirmojnë se Ballkani Perëndimor funksionon gjithnjë e më shumë si një hapësirë e ndërlidhur lëvizjeje, ku kufijtë shihen më pak si barriera dhe më shumë si ura bashkëpunimi. Për Shqipërinë, niveli i lartë i udhëtimeve rajonale reflekton jo vetëm afërsinë gjeografike, por edhe rolin në rritje të vendit në turizëm, tregti dhe shkëmbime ndërkufitare./Scan.al/
