Jeta në Shqipëri po vështirësohet çdo ditë e më shumë për familjet, për shkak të rritjes së ndjeshme të kostove bazë të jetesës. Sipas të dhënave të publikuara nga INSTAT, një familje mesatare ka nevojë për rreth 93 mijë lekë në muaj për të mbuluar shpenzimet minimale.
Në kryeqytet, kjo shifër rritet në rreth 108 mijë lekë, duke e bërë Tiranën qytetin më të shtrenjtë në vend. Raporti i INSTAT-it gjithashtu analizoi mënyrën si ndryshojnë shpenzimet në varësi të nivelit arsimor të kryefamiljarit.
Gjatë vitit 2024, familjet me kryefamiljar me arsim të lartë shpenzuan më pak në krahasim me një vit më parë, duke treguar një menaxhim më të kujdesshëm të buxhetit. Ndërsa familjet me nivel arsimor më të ulët shfaqën rritje të shpenzimeve.
Kjo tendencë tregon se niveli i arsimimit nuk ndikon direkt në shumën totale të shpenzuar, por lidhet ngushtë me aftësinë për të kursyer dhe për të planifikuar më mirë të ardhurat.
Në krahasim me qytetet e tjera, Tirana mbetet e vështirë për t’u përballuar financiarisht nga individët me paga të vetme, kryesisht për shkak të rritjes së shpejtë të çmimeve dhe kostove të shërbimeve.
Gjithashtu, taksimi i të dypunësuarve në kryeqytet shihet si një politikë e diskutueshme, që sipas shumë vëzhguesve ndikon negativisht në standardin e jetesës dhe rrit vështirësitë ekonomike për qytetarët.
