Sindikata Shqiptare e Taksive ka reaguar për vendimin e Entit Rregullator të Energjisë për rritjen e çmimit të energjisë në stacionet e karikimit të makinave elektrike.
Në letrën drejtuar Ministrisë së Infrastrukturës dhe Energjisë (MIE) dhe ERE, Sindikata u kërkon atyre të rishikojnë vendimin për rritjen e çmimit të energjisë për pikat e karikimit të makinave elektrike, me fuqi të instaluar mbi 11 kW.
Me një vendim të datës 15 tetor, Enti miratoi që çmimi i ri për pikat/stacionet e karikimit me fuqi të instaluar mbi 11 kW që rriste çmimin e energjisë për këto kategori nga 14 lekë që është aktualisht në 22 lekë/kWh. Vendimi hyn në fuqi nga data 1 nëntor. Në pik, energjia për këto kategori do të paguhet 15% më shumë se çmimi normal çka rezulton në një tarifë 25.3 lekë/kWh.
Sindikata Shqiptare e Taksive kërkon pezullim të menjëhershëm të zbatimit të tarifës së re deri në zhvillimin e një dëgjimi publik me Sindikatën Shqiptare të Taksive dhe grupet e tjera të interesit.
Së dyti, rishikimin e tarifës me qëllim vendosjen e një çmimi preferencial për taksitë elektrike, si sektor shërbimi publik me ndikim social dhe mjedisor.
Së treti kërkohet krijimi i një mekanizmi subvencionimi apo lehtësie fiskale, për të mos e kthyer investimin ekologjik të qindra shoferëve në barrë ekonomike.
“Ky vendim, në formën aktuale, ndikon drejtpërdrejt dhe rëndë sektorin e transportit taksi në Shqipëri, pasi mbi 70% e automjeteve të shërbimit taksi janë tashmë mjete elektrike, të blera përmes kredive bankare, si pjesë e angazhimit për një transport më ekologjik, më ekonomik dhe pa ndotje për qytetet shqiptare”, theksohet në letrën drejtuar MIE dhe ERE.
Drejtuar:
Ministrisë së Infrastrukturës dhe Energjisë
Entit Rregullator të Energjisë (ERE)
Nga:
SINDIKATA SHQIPTARE E TAKSIVE
Lënda:
Kërkesë për pezullimin dhe rishikimin e tarifës së re të energjisë elektrike për stacionet e karikimit të mjeteve elektrike
I nderuar Kryetar i Entit Rregullator të Energjisë,
E nderuar Znj. Ministre,
Sindikatës Shqiptare të Taksive i është përcjellë me shqetësim vendimi i fundit i ERE-s për vendosjen e një tarife të re dhe të diferencuar për energjinë elektrike në stacionet e karikimit të makinave elektrike, që hyn në fuqi më 1 nëntor 2025, me çmim 22 lekë/kËh dhe 25.3 lekë/kËh në orar piku (18:00–23:00).
Ky vendim, në formën aktuale, ndikon drejtpërdrejt dhe rëndë sektorin e transportit taksi në Shqipëri, pasi mbi 70% e automjeteve të shërbimit taksi janë tashmë mjete elektrike, të blera përmes kredive bankare, si pjesë e angazhimit për një transport më ekologjik, më ekonomik dhe pa ndotje për qytetet shqiptare.
Sindikata Shqiptare e Taksive, si përfaqësuese ligjore e këtij grupi të madh interesi, nuk është ftuar dhe nuk është konsultuar në procesin paraprak të vendimmarrjes, ndonëse ligji kërkon përfshirjen e grupeve të interesit në vendime që prekin drejtpërdrejt ekonominë e tyre.
Ky mungesë konsultimi dhe transparence bie ndesh me parimet e Ligjit nr. 43/2015 “Për sektorin e energjisë elektrike” dhe me praktikat e mira të dialogut social.
Ne theksojmë se rritja e çmimit të energjisë për karikimin e mjeteve elektrike penalizon transportin e gjelbër, dekurajon investimet në energji të pastër, dhe bie ndesh me objektivat e qeverisë për dekarbonizim dhe ulje të ndotjes urbane.
Nëse ky vendim nuk rishikohet, Sindikata Shqiptare e Taksive do të detyrohet të përdorë të gjitha mjetet ligjore dhe demokratike të mbrojtjes së interesit të anëtarëve të saj, përfshirë ankesa administrative dhe gjyqësore./Monitor
