Duke nisur nga fillimi i vitit të ardhshëm, qytetarët që do të blejnë makina të përdorura do të përballen me kosto më të larta. Ministria e Financave ka publikuar një udhëzim të ri, ku përcaktohen çmimet e reja të referencës për zhdoganimin e automjeteve.
Sipas udhëzimit, të gjitha automjetet e përdorura që importohen nga Europa, Kina apo Koreja e Veriut do t’i nënshtrohen tarifave të reja dhe më të larta të zhdoganimit. Pagesa do të bëhet në bazë të madhësisë së cilindratës së automjetit.
Për autoveturat deri në 1.400 cc, pragu minimal i zhdoganimit rritet nga 130 mijë lekë në 162.5 mijë lekë, rreth 25% më shumë. Ndërsa për automjetet me cilindratë 1.400–1.900 cc, vlera rritet nga 200 mijë në 250 mijë lekë.
Udhëzimi parashikon rritje edhe për automjetet me cilindratë më të lartë, ku për mjetet e përdorura mbi 4.500 cc, tarifa e zhdoganimit arrin deri në 1 milion lekë.
Nga këto ndryshime preken edhe bizneset që përdorin kamionçina, furgonë dhe kamionë. Për mjetet deri në 1.5 tonë, pragu minimal i zhdoganimit rritet nga 400 mijë në 500 mijë lekë, ndërsa për kamionët mbi 15 tonë nga 1.2 milion në 1.5 milion lekë.
Sipas statistikave zyrtare, në periudhën janar–nëntor 2025 janë regjistruar për herë të parë 89.654 mjete, nga të cilat 73.066 janë autovetura. Të dhënat tregojnë se rreth 80% e tyre janë mjete me mbi 8 vite përdorim.
