Situata në segmentin rrugor Librazhd – Përrenjas, në zonën e njohur si Arrat e Gurrës, është përkeqësuar ndjeshëm. Rrëshqitja e tokës dhe fundosja e urës kanë vijuar me intensitet më të lartë, duke e kthyer zonën në një pikë me rrezik të shtuar për qarkullimin.
Për shkak të rrezikut aktiv të shembjes, autoritetet kanë vendosur ndalimin e plotë të qarkullimit për këmbësorët, automjetet dhe mjetet e emergjencës, përfshirë zjarrfikësen, policinë dhe ambulancën.
Shërbimet emergjente do të devijohen përmes rrugës alternative që kalon nga fshatrat Spathar dhe Dardhë.
Autoritetet u bëjnë thirrje qytetarëve të mos tentojnë të kalojnë në zonën e rrezikut. Segmenti mbetet nën monitorim të vazhdueshëm, ndërsa izolimi i plotë i zonës është konsideruar masë e domosdoshme për të shmangur pasoja të rënda.
