Prej 1 nëntorit në të gjitha pikat kufitare mes Shqipërisë dhe Kosovës është rikthyer regjimi i lëvizjes pa kontrolle për automjetet me targa shqiptare dhe kosovare. Ky lehtësim do të qëndrojë në fuqi deri më 28 shkurt të vitit të ardhshëm.
Gjatë kësaj periudhe, kontrollet kufitare do të kryhen vetëm për mjetet me targa të huaja, por me procedura të përshpejtuara për të shmangur pritjet e gjata, sidomos në pikat më të ngarkuara si Morina dhe Vermica.
Regjimi pa kontrolle rikthehet pas një pezullimi njëmujor në tetor, kohë gjatë së cilës autoritetet shqiptare dhe kosovare zhvilluan procesin e regjistrimit dhe kontrollit të mjeteve dhe udhëtarëve. Edhe gjatë asaj periudhe, fundjavat dhe festat zyrtare mbetën të përjashtuara nga kontrollet.
Sipas marrëveshjes mes dy qeverive, periudhat e lëvizjes së lirë pa kontrolle janë 1 maj – 30 shtator dhe 1 nëntor – 28 shkurt, ndërsa në muajt mars, prill dhe tetor zbatohen kontrolle të rregullta, me përjashtim të ditëve të pushimit zyrtar.
Ky model qarkullimi, që u aplikua për herë të parë disa vite më parë, synon të lehtësojë lëvizjen e qytetarëve, të nxisë bashkëpunimin ekonomik dhe të ulë trafikun kufitar, veçanërisht gjatë sezonit turistik veror kur fluksi i udhëtimeve mes dy vendeve rritet ndjeshëm.
