Instituti për Liri dhe Trashëgimi publikoi sot raportin përmbledhës të një studimi kombëtar mbi qëndrimet e qytetarëve ndaj projektligjit “Për Barazinë Gjinore” (2025), i cili po diskutohet aktualisht në arenën publike dhe institucionale.
Ky raport, i bazuar në sondazhin më të madh të kryer ndonjëherë mbi këtë temë në Shqipëri, përfshin përgjigjet e 10,010 qytetarëve nga të gjitha qarqet e vendit. Me një margjinë gabimi prej vetëm ±1.2% dhe një nivel besueshmërie prej 95%, qëllimi i raportit është të ofrojë një pasqyrë të qartë dhe të besueshme të opinionit publik.
Gjetjet kryesore të studimit:
97.6% e të anketuarve e përcaktojnë gjininë si mashkull dhe femër biologjik, duke refuzuar konceptin e “identiteteve gjinore” si konstrukt social.
99% e qytetarëve e konsiderojnë familjen tradicionale (burrë, grua dhe fëmijë) si themeli i shoqërisë shqiptare.
96% shprehen kundër zëvendësimit të termave “nënë” dhe “babë” me “Prind 1 / Prind 2”, duke e cilësuar këtë si konfuzion potencial për fëmijët.
95.7% refuzojnë futjen e edukimit gjinor në shkolla, të cilin e shohin si indoktrinim ideologjik, jo si edukim për barazi.
92.1% janë kundër martesave dhe adoptimit nga persona të të njëjtës gjini, edhe në rast se kjo do të përbënte një kusht për anëtarësimin e Shqipërisë në BE.
85% kërkojnë që qeveria të fokusohet më shumë në mbrojtjen e familjes dhe rritjen e lindshmërisë, sesa në promovimin e politikave gjinore.
94% e qytetarëve kërkojnë që ligjet që prekin vlerat morale dhe familjare të miratohen vetëm përmes referendumeve popullore, jo vetëm me vendime parlamentare.
