Afro 15% e popullsisë në Shqipëri përballet me vështirësi serioze financiare për të mbuluar shërbimet shëndetësore. Alarmi vjen nga një raport i ri global i Bankës Botërore dhe Organizatës Botërore të Shëndetësisë, i cili thekson se kostoja e ilaçeve është burimi kryesor i kësaj barre ekonomike.
Sipas raportit, në tre të katërtat e vendeve me të dhëna të disponueshme, ilaçet përbëjnë të paktën 55% të shpenzimeve shëndetësore familjare. Situata është edhe më e rëndë për personat që jetojnë në varfëri, të cilët shpenzojnë mesatarisht 60% të buxhetit të tyre shëndetësor vetëm për medikamente, duke reduktuar mundësinë për të përballuar nevoja të tjera bazë.
Raporti paralajmëron se, pa përshpejtim të reformave dhe mbështetje më të madhe financiare, mbulimi i plotë shëndetësor pa kosto të papërballueshme do të mbetet një objektiv i largët. Indeksi global i mbulimeve shëndetësore pritet të arrijë vetëm 74 nga 100 pikë deri në vitin 2030, duke lënë 1 në 4 persona në botë ende në vështirësi financiare në fund të periudhës së Objektivave të Zhvillimit të Qëndrueshëm.
