Në Shqipëri nuk mjafton të jesh student për të siguruar një vend në konvikt; duhet edhe të kesh një mik. Dhe nëse nuk ke një të tillë, të pret dhuna nga shteti. Pas skandalit të regjistruar në konviktet e Fakultetit të Mjekësisë, një tjetër ngjarje tronditëse ka ndodhur në Qytetin Studenti. Një video që qarkullon në rrjetet sociale tregon momentet kur studentë të dëshpëruar shtyhen nga policia, pasi kanë pritur deri në orën 03:00 të mëngjesit për të përfituar një dhomë konvikti.
Në vend që të përballen me një proces të drejtë dhe transparent, studentët trajtohen si të padëshiruar në vendin e tyre. Sipas denoncimeve, vetëm 10 persona kanë përfituar dhoma, ndërsa dhjetëra të tjerë janë përzënë pa asnjë shpjegim. Dera është mbyllur, ndërsa policia, në vend që të zgjidhë problemin, ka ndërhyrë për t’i shtyrë me forcë jashtë.
Qeveria vazhdon të mburret me fasadat në Qytetin Studenti, ndërsa korridoret e konvikteve janë kthyer në skena burokratike dhe padrejtësie. Për rastin nuk ka asnjë reagim nga Ministria e Arsimit apo Bashkia e Tiranës, ndërkohë që studentët, që për pak ditë fillojnë vitin akademik, nuk sigurojnë dot vendin ku do të qëndrojnë.
Kjo situatë është e përvitshme dhe, pavarësisht denoncimeve të njëpasnjëshme, ende nuk ka ndryshuar asgjë. Në një vend që po braktiset përditë nga të rinjtë, raste të tilla janë një gozhdë tjetër në arkivolin e shpresës se diçka do të ndryshojë.
