Mosmarrja e pagave prej disa muajsh dhe reduktimi i stafit kanë nxjerrë në protestë punonjësit e kompanisë së sigurisë që operon për Bankers Petroleum, “SHPSF Serjani”. Ata kërkojnë ndërhyrje të menjëhershme për zgjidhjen e situatës, duke theksuar se po vijojnë punën pa pasur garanci financiare.
Sipas punonjësve, nga rreth 380 të punësuar që kishte kompania më herët, aktualisht kanë mbetur vetëm rreth 120 persona në punë. Ata pretendojnë se prej 7 muajsh nuk kanë marrë pagat, ndërsa situata ekonomike për familjet e tyre është bërë gjithnjë e më e vështirë.
Punonjësit kërkojnë reagim nga drejtuesit e kompanisë dhe institucionet përgjegjëse, duke theksuar se puna vazhdon normalisht, por pa pagesë dhe pa siguri për të ardhmen e punësimit.
Situata e vonesave të pagave tek nënkontraktorët e lidhur me Bankers Petroleum është raportuar edhe më herët, ku punëtorë të ndryshëm kanë deklaruar se kanë mbetur pa paga për disa muaj, pavarësisht se kanë vijuar punën.
Punonjësit e “SHPSF Serjani” paralajmërojnë se do të vazhdojnë protestat paralelisht me punën deri në zgjidhjen përfundimtare të problematikës, duke kërkuar shlyerjen e pagave të prapambetura dhe garanci për vazhdimësinë e punësimit.
