Rov tek shkrimi ne faqe vendis kete
Banorët e Vlorës, të përballur prej katër ditësh me mungesën e ujit të pijshëm, dolën sot në protestë para Teatrit “Petro Marko”. Situata u tensionua kur një pjesë e protestuesve thyen kordonin e policisë dhe hynë në ambientet e teatrit, duke ndërprerë edhe një mbrëmje gala që po zhvillohej aty.
Qytetarët u futën në sallë me bidonë dhe pankarta në duar, duke kërkuar zgjidhje të menjëhershme për furnizimin me ujë dhe refuzuan të largoheshin nga ambientet e godinës. Në vendngjarje u angazhuan forca të shumta policie, të pozicionuara brenda dhe jashtë teatrit, të cilat u kërkuan protestuesve të dalin jashtë. Pas përplasjeve me policinë, disa prej protestuesve u shoqëruan.
Pas ndërprerjes së aktivitetit, protesta vijoi në rrugë, ku qytetarët bllokuan qarkullimin e automjeteve, në shenjë revolte ndaj situatës së krijuar. Protestuesit shprehën indinjatën ndaj asaj që e konsiderojnë neglizhencë të institucioneve lokale dhe paralajmëruan se do të vijojnë mobilizimin. Ata kanë njoftuar një tjetër protestë ditën e nesërme, në orën 11:00, deri në marrjen e një përgjigjeje konkrete për rikthimin e furnizimit me ujë.
