Qytetarët e Vlorës kanë protestuar këtë të hënë përpara bashkisë së qytetit, në shenjë revolte për mungesën e ujit të pijshëm që prej pesë ditësh ka përfshirë pjesën më të madhe të qytetit.
Të irrituar nga situata e zgjatur, protestuesit kanë akuzuar institucionet për keqmenaxhim dhe abuzim me fondet publike. “Kanë vjedhur 50 milionë euro investime nga ujësjellësit. Nëse nuk vjen askush të na japë zgjidhje, do zbresim dhe do bllokojmë aksin kryesor”, u shpreh një prej qytetarëve. Një tjetër paralajmëroi rrezikun për shëndetin publik: “I vraftë Zoti, jemi në prag të një epidemie”.
Edhe pse ndodhemi në prag festash, qytetarët e Vlorës kanë plot katër deri në pesë ditë pa furnizim me ujë të pijshëm, një situatë e pazakontë dhe alarmante, e cila ende nuk ka gjetur zgjidhje nga Ujësjellësi. Mungesa e ujit ka sjellë edhe pezullimin e aktivitetit të dhjetëra bizneseve në qytet.
Protesta e sotme, më 29 dhjetor, u zhvillua para ambienteve të bashkisë, ku ishte e pranishme edhe policia. Situata u tensionua pasi protestuesit përplasën dyert e institucionit dhe tentuan të futen brenda godinës. “Duam ujë”, “Të vijë kryetarja”, “Hapni dyert e bashkisë”, ishin thirrjet që dëgjoheshin në sfond. “Për t’u larë, se ujë të pijshëm nuk ka në gjithë Shqipërinë”, deklaroi një nga protestuesit.
Tensionet nisën që të dielën, kur qytetarët vërshuan në Teatrin e qytetit “Petro Marko”, duke mos lejuar zhvillimin e një koncerti. Për shkak të situatës, artistët u detyruan të largoheshin nga skena dhe eventi u anulua. Në vendngjarje ndërhyri policia, e cila shoqëroi disa persona.
Qytetarët paralajmërojnë përshkallëzim të protestave nëse problemi i furnizimit me ujë nuk zgjidhet urgjentisht.
