Thirrja për protestë kundër çmimeve të larta të karburanteve, e parashikuar për pasditen e kësaj të hëne para Kryeministrisë, përfundoi në një tubim pothuajse të papërfillshëm. Në vend të një reagimi masiv, në shesh u panë vetëm disa aktivistë dhe një numër i vogël qytetarësh, ndërsa prania e automjeteve të mediave dukej më e madhe se ajo e protestuesve.
Tubimi ishte njoftuar përmes rrjeteve sociale nga përfaqësues të shoqërisë civile dhe aktivistë të Lëvizjes “Shqipëria Bëhet”, të cilët u kishin bërë thirrje qytetarëve të bashkoheshin për të kundërshtuar çmimet e larta të naftës dhe për të kërkuar uljen e tyre.
Megjithatë, në vendin ku ishte planifikuar protesta, para zyrës së kryeministrit, u panë kryesisht efektivë policie, disa aktivistë dhe ekipet e mediave që prisnin zhvillime që nuk erdhën.
