Banorët e zonës protestuan në aksin rrugor Qukës–Qafë Plloçë, në dalje të fshatit Kalivaç, duke bllokuar për rreth 10 minuta qarkullimin në të dyja drejtimet.
Ndërhyrja e Policisë u bë e domosdoshme për të liruar rrugën, ndërsa situata u shoqërua me tensione dhe përplasje verbale mes banorëve dhe drejtuesve të mjeteve, disa prej të cilëve deklaruan se kishin pasagjerë të sëmurë.
Protestuesit kundërshtojnë mbylljen e një rruge ekzistuese që lidh tre fshatra me aksin e ri Qukës–Qafë Plloçë dhe kërkojnë ndërhyrjen e autoriteteve për rihapjen e saj. Ata theksojnë se rruga është jetike, pasi u mundëson aksesin drejt fshatit dhe tokave bujqësore.
Ndërkohë, inxhinierët argumentojnë se dalja e kësaj rruge në aksin kryesor përbën rrezik për aksidente. Pavarësisht kësaj, banorët paralajmëruan se do të vijojnë protestat deri në gjetjen e një zgjidhjeje të qëndrueshme.
