Kroacia ditë më parë ka ndaluar disa ngarkesa me domate dhe pjeshkë nga Shqipëria, pasi analizat laboratorike treguan se ato përmbanin nivele të larta pesticidesh dhe metali të rëndë, si nikeli. Ky zhvillim ka krijuar shqetësim në tregun rajonal të produkteve bujqësore.
Në një reagim për mediat e Kosovës, zëdhënësi i Agjencisë për Ushqim dhe Veterinarinë (AUV), Lamir Thaçi, ka bërë të ditur se produkte të tilla nuk kanë hyrë në tregun vendas.
“Kontrollet kryhen bazuar në planin nacional të kontrolleve zyrtare dhe të mostrimit, të cilat bazohen në vlerësimin e riskut. Në kuadër të planeve me qëllim të monitorimit dhe kontrollit të mbetjeve të pesticideve në fruta dhe perime (përcaktimi i niveleve të lejuara të mbetjeve – MRL), AUV ka marrë mostrat në mënyrë sistemike. Këto mostra janë testuar në laboratorë të BE-së, me metoda konfirmative”, ka deklaruar Thaçi.
Ai ka theksuar se rezultatet e deritanishme kanë qenë të pranueshme dhe gjithmonë i janë referuar standardeve ndërkombëtare dhe rregulloreve të Bashkimit Evropian për mbetjet e pesticideve. Sipas Thaçit, gjatë verës, përfshirë edhe muajin shtator, importi i këtyre produkteve nga Shqipëria në Kosovë ka qenë minimal, pasi tregu vendor mbulohet me prodhime të brendshme.
“Frekuenca e mostrimit është e lartë gjatë sezonit të fluksit të importeve, ndërsa aktualisht kemi shumë pak apo aspak importe të këtyre produkteve nga Shqipëria. Tregu mbulohet me prodhime vendore”, ka shtuar ai.
Zëdhënësi i AUV-it gjithashtu ka theksuar se ekziston një bashkëpunim i mirë me institucionet homologe në Shqipëri, si Agjencia Kombëtare e Ushqimit (AKU) dhe Autoriteti Kombëtar i Mbikëqyrjes Veterinare dhe Bimësore (AKMVB).
“Në çdo rast të dyshimeve për sigurinë e ndonjë produkti që tregtohet mes dy vendeve, shkëmbehen menjëherë informacionet. Kur kemi ndonjë dyshim konkret, AUV e ngre menjëherë nivelin e kontrollit dhe ndërmerr masa shtesë për të verifikuar në detaje çdo produkt apo ngarkesë”, ka përfunduar Thaçi.
