Banorët e zonës së Rrjollit, në Velipojë, kanë bllokuar që në orët e para të mëngjesit rrugën për makineritë e kompanisë Gener 2, në pronësi të biznesmenit Bashkim Ulaj. Kompania po ndërton një resort luksoz në zonë, ndërsa banorët prej ditësh protestojnë duke pretenduar se u është grabitur prona.
Forcat e Policia e Shtetit kanë mbërritur rreth orës 08:30, duke bërë të mundur largimin e banorëve nga rruga dhe hapjen e kalimit për makineritë e kompanisë.
Gjatë ndërhyrjes, policia ka shoqëruar në komisariat 6 persona për rezistencë ndaj forcave të rendit. Banorët janë mbledhur më pas në qendër të fshatit, duke deklaruar për mediat se nuk do të tërhiqen nga mbrojtja e tokës së tyre. Ata i janë drejtuar me thirrje kryeministrit Edi Rama dhe institucioneve të drejtësisë për zgjidhje të situatës.
“Kemi shkuar në orën 6:30 për të mos lejuar makineritë të hyjnë në pronat tona. Në orën 9 erdhën furgonat dhe na u turrën me skafandra. Pse nuk na ndihmojnë? Duam drejtësi. Nëse është e nevojshme, të futemi në burg, por tokën nuk e lëshojmë”, u shpreh një prej banorëve.
