Në Vermosh u shënua 80-vjetori i pushkatimit të Prekë Calit dhe 13 bashkëluftëtarëve të tij nga regjimi komunist, ngjarje e njohur si Kryengritja e Malësisë së Madhe kundër diktaturës.
Historianë, klerikë dhe përfaqësues të ish-të përndjekurve politikë e cilësuan këtë përvjetor si kujtesë të një prej episodeve më të dhimbshme të historisë shqiptare. Famullitari i Bajzës, padër Vitor Demaj, theksoi rëndësinë e ruajtjes së kujtesës historike, ndërsa Besim Ndregjoni, kryetar i Unionit të ish-të përndjekurve politikë, akuzoi klasën politike se në tri dekada demokraci nuk ka marrë asnjë hap real për dënimin e krimeve të komunizmit.
Nga ana tjetër, kryetari i ish-të përndjekurve politik në Kelmend, Nik Doni, ngriti shqetësimin për mungesën e lejes së rindërtimit të kullës së shkatërruar të Prekë Calit, duke e parë këtë si një padrejtësi të qëllimshme ndaj figurës së tij.
Pas disfatës së kryengritjes, Prekë Cali u strehua në një shpellë në Vukël me 15 të tjerë, por u dorëzua përmes ndërmjetësimit të një kleriku, me shpresën se do t’i shpëtonte dhunës. Komunistët nuk mbajtën fjalën: më 25 mars 1945, ai dhe shokët e tij u pushkatuan. Për vite me radhë, malësorët e Kelmendit u përballën me dhunë, tortura e dënime nga diktatura e Enver Hoxhës.
Sot, për ta, Prekë Cali mbetet simbol i qëndresës dhe i luftës për liri.
