Kreu i Shoqatës së Operatorëve Turistikë, Zak Topuzi, ka ngritur alarmin për situatën e parkimeve në kryeqytet, duke e cilësuar atë si një krizë sociale në rritje që po rëndon drejtpërdrejt mbi qytetarët.
Sipas Topuzit, Bashkia e Tiranës po heq parkimet në unazë dhe në rrugët kryesore për t’i zëvendësuar me korsi për autobusë, taksi dhe biçikleta. Ai thekson se kjo është një masë e nevojshme për përmirësimin e mobilitetit urban, por problemi qëndron te mungesa totale e alternativave reale për parkim.
“Sot, një vend parkimi në Tiranë shitet nga 40 deri në 80 mijë euro, ndërsa qiratë mujore variojnë nga 80 deri në 150 euro. Këto janë shifra të papërballueshme për pagat reale në Shqipëri”, deklaron Topuzi. Ai shton se parkimet publike kanë tarifa të larta, ndërsa gjobat për parkim të gabuar kanë arritur kulmin, duke e kthyer parkimin në një barrë financiare për familjet.
Në reagimin e tij, Topuzi kritikon edhe opozitën, e cila sipas tij është e përqendruar vetëm te debati për korrupsionin e madh dhe nuk po merret me problemet e përditshme që prekin drejtpërdrejt qytetarin. “Duke mos i kthyer këto halle në kauza reale, opozita është larguar nga baza e saj”, shprehet ai.
Kreu i Shoqatës së Operatorëve Turistikë propozon disa zgjidhje konkrete që mund të aplikohen edhe në Tiranë, si ndërtimi i parkimeve publike me kate në pronë të bashkisë, vendosja e tarifave mujore të subvencionuara për banorët me të ardhura të ulëta, krijimi i parkimeve “Park & Ride” në hyrje të qytetit të kombinuara me transport publik, si dhe kthimi i shesheve të lira të ndërtimit në parkime me kate, qoftë edhe provizore, përmes stimujve fiskalë për ndërtuesit.
“Nuk mund të ndëshkosh qytetarin vetëm me gjoba, pa i dhënë alternativë”, thekson Topuzi, duke nënvizuar se parkimi nuk është luks, por një nevojë urbane për një qytet funksional dhe të jetueshëm.
