Në një ceremoni madhështore të mbajtur në Sheshin e Shën Pjetrit, ku morën pjesë dhjetëra mijëra besimtarë nga e gjithë bota, Papa Leoni XIV shpalli shenjtor Carlo Acutis, 15-vjeçarin italian i njohur për devocionin e tij të thellë dhe përdorimin e teknologjisë në shërbim të fesë.
Carlo Acutis konsiderohet si shenjti i parë i brezit të “milenialëve”, një figurë që tashmë frymëzon miliona katolikë të rinj anembanë globit. Ati i Shenjtë theksoi në homelinë e tij se “Carlo është një dëshmi e gjallë se shenjtëria nuk është çështje moshe, por dashurie për Zotin dhe gatishmërie për të jetuar Ungjillin në përditshmëri, edhe përmes mjeteve moderne që koha na ofron.”
Acutis lindi më 3 maj 1991 në Londër, në një familje katolike të pasur, por thellësisht të përkushtuar ndaj fesë. Shumë shpejt pas lindjes, familja u zhvendos në Milano, ku Carlo kaloi një fëmijëri të gëzuar, por të shënuar nga një përkushtim i veçantë shpirtëror. I apasionuar pas teknologjisë dhe shkencave kompjuterike, ai lexonte libra të avancuar mbi programimin që në moshë fare të re dhe krijoi një faqe interneti shumëgjuhëshe për të dokumentuar mrekullitë eukaristike të njohura nga Kisha Katolike. Ky projekt, i përfunduar në një kohë kur ndërtimi i faqeve të tilla ishte kryesisht fushë e profesionistëve, i dha atij nofkën “Influenceri i Zotit”.
Në tetor të vitit 2006, Carlo u diagnostikua me leuçemi akute. Brenda pak ditësh, ai ndërroi jetë në moshën 15-vjeçare. Ai u varros në Assisi, qyteti i lidhur ngushtë me figurën e Shën Françeskut, ku sot trupit të tij mund t’i bëjnë homazh besimtarët, të cilët e shohin përmes një varri xhami, i veshur me xhinse, një bluzë të thjeshtë dhe atlete Nike.
Që prej vdekjes së tij, Carlo Acutis është kthyer në një figurë frymëzimi për miliona të rinj katolikë, duke u bërë simbol i shenjtërisë moderne. Procesi i shenjtërimit të tij u zhvillua me shpejtësi të jashtëzakonshme, duke reflektuar ndikimin e madh shpirtëror që ai ka pasur mbi brezin e ri.
Në të njëjtën Meshë, Papa Leoni XIV shpalli shenjtor edhe Pier Giorgio Frassati, një tjetër figurë e shquar e fesë katolike që vdiq në moshë të re. I lindur në Torino më 1901, Frassati u dallua për jetën e tij të përkushtuar ndaj të varfërve dhe përhapjen e fesë në rrethin e tij shoqëror. Ai ndërroi jetë në vitin 1925, në moshën 24-vjeçare, pas një sëmundjeje të papritur nga poliomeliti.
Fillimisht, ceremonia e shenjtërimit ishte planifikuar për në fillim të vitit, por u shty pas ndarjes nga jeta të Papa Françeskut në prill. Papa Françesku kishte qenë mbështetës i madh i kauzës së shenjtërimit të Acutis, i bindur se Kisha kishte nevojë për një figurë të tillë për të afruar të rinjtë me fenë. Shenjtërimi i Carlo Acutis dhe Pier Giorgio Frassati shënon një hap historik për Kishën Katolike, duke ofruar dy figura të rinjsh të devotshëm si modele për besimtarët e sotëm dhe të ardhshëm. Ceremonia e sotme u konsiderua nga shumë si një moment që lidhi traditën e shekujve me gjuhën e brezave të rinj.
