Vatikani – Papa Leo XIV ka dhënë një mesazh të fuqishëm për mbrojtjen e dinjitetit njerëzor në epokën e inteligjencës artificiale, gjatë Meshës së parë të mbajtur ndonjëherë në Vatikan për influencuesit katolikë të rrjeteve sociale.
Në fjalimin e tij në Bazilikën e Shën Pjetrit, Ati i Shenjtë theksoi se asgjë që buron nga krijimtaria e njeriut nuk duhet të përdoret për të cenuar dinjitetin e të tjerëve. “Asgjë që vjen nga njeriu dhe krijimtaria e tij nuk duhet të përdoret për të minuar dinjitetin e tjetrit,” tha ai.
Duke folur në kuadër të “Jubileut të Rinisë”, një ngjarje që organizohet çdo 25 vjet dhe mbledh të rinj nga e gjithë bota, Papa theksoi se teknologjia në zhvillim duhet të vihet në shërbim të mbarë njerëzimit. Ai e quajti këtë një “sfidë” për botën moderne dhe nënvizoi rëndësinë e ruajtjes së aftësisë për të dëgjuar dhe për të komunikuar në këtë epokë të re.
“Kemi detyrimin të zhvillojmë një mënyrë të re të të menduarit, një gjuhë të kohës sonë, që i jep zë dashurisë,” u shpreh Papa Leo XIV. Influencuesit katolikë u bënë thirrje të jenë “agjentë të bashkimit”, që luftojnë ndarjen, polarizimin, individualizmin dhe egoizmin me përmbajtjen që krijojnë.
Ky është qëndrimi më i fundit i Papës përballë zhvillimeve teknologjike, veçanërisht inteligjencës artificiale. Që nga zgjedhja e tij në maj, ai ka bërë disa deklarata lidhur me nevojën për të ruajtur drejtësinë dhe dinjitetin përballë përparimeve teknologjike.
Gjatë adresimit të tij të parë të së dielës në maj, Papa Leo XIV kishte deklaruar se përballë zhvillimeve si AI, Kisha ka një rol thelbësor për të mbrojtur drejtësinë dhe dinjitetin njerëzor.
Papa Leo XIV është papa i parë amerikan në histori. Ai ka lindur në Çikago në vitin 1955 nga prindër me prejardhje spanjolle dhe franko-italiane. Ka studiuar matematikë në Universitetin Villanova në Filadelfia dhe është shuguruar si prift në vitin 1982. Pavarësisht se u shpërngul në Peru tre vite më pas, ai ka ruajtur lidhje të ngushta me SHBA-në, ku ka shërbyer vazhdimisht si prift dhe prior.
Papa është i njohur për përkushtimin e tij ndaj komuniteteve të margjinalizuara dhe ndërtimin e urave të bashkëpunimit mes njerëzve dhe kulturave të ndryshme.
