84% e qytetarëve europianë e mbështesin idenë, ndërsa 352,000 italianë kanë firmosur një peticion për ta bërë realitet: ora ligjore e verës gjatë gjithë vitit. Në Itali, kjo çështje po merr një dimension të ri, pasi të hënën do të paraqitet zyrtarisht në Parlament.
Ndryshimi i orës është rikthyer si një nga temat më të debatueshme në nivel kombëtar dhe europian. Gjithnjë e më shumë qytetarë, ekspertë dhe institucione po shprehen kundër ndryshimit pranverë-vjeshtë, duke kërkuar heqjen e tij përgjithmonë.
Në Spanjë, vetëm pak javë më parë, kryeministri Pedro Sánchez e riktheu çështjen në tryezën europiane, duke e cilësuar ndërrimin e orës si “krejtësisht të pakuptimtë” dhe duke i kërkuar Brukselit rihapjen e diskutimit që ka mbetur pezull prej vitesh. Edhe pse për momentin veprimi i Spanjës nuk përfshin votim apo debat formal, ai është konsideruar i mjaftueshëm për ta rikthyer çështjen në qendër të vëmendjes së Bashkimit Europian, shkruan Corriere della Sera.
Ndërkohë, në Itali, ideja e ruajtjes së orës së verës për 12 muaj po avancon, e mbështetur nga argumente që lidhen me kursimin e energjisë, uljen e ndotjes, përmirësime në shëndetin publik si dhe rritjen e sigurisë. Të hënën, deputetët do të prezantojnë kërkesën për një hetim faktmbledhës në Komitetin e Aktiviteteve Produktive, iniciativë e promovuar nga shoqata mjekësore SIMA, nga një organizatë jofitimprurëse, si dhe nga deputeti i LEGA-s, Andrea Barabotti.
Gjatë seancës, do të dorëzohen zyrtarisht 352,000 firmat e qytetarëve të mbledhura përmes peticionit online, i cili kërkon që ora e verës të mbetet në fuqi gjatë gjithë vitit. Hetimi, nëse miratohet, do të analizojë në mënyrë të detajuar ndikimet e mundshme të kësaj mase: konsumin e energjisë, pasojat mjedisore, efektet në shëndetin publik, sigurinë, si dhe ndryshimet në zakonet sociale.
