Situata në lumin Vjosë është përkeqësuar ndjeshëm, pasi niveli i ujit ka arritur në 8 metra, duke shkaktuar rrezik të shtuar për përmbytje në disa zona të ultësirës. Autoritetet e Emergjencave Civile kanë ndërhyrë menjëherë, duke kryer evakuimin e familjeve që ndodheshin më pranë lumit.
Sipas të dhënave zyrtare, janë evakuuar gjithsej 10 familje të komunitetit rom:
7 familje në Novoselë, ku niveli i ujit ka filluar të shtrihet në tokat bujqësore dhe rrezikon banesat;
3 familje në fshatin Fitore, ku situata është konsideruar veçanërisht e pasigurt për shkak të afrimit të shpejtë të prurjeve.
Emergjencat Civile kanë vendosur familjet në ambiente të sigurta të përkohshme dhe janë në gatishmëri të plotë për çdo zhvillim të mëtejshëm. Ndërkohë, ekipet në terren po monitorojnë në vijimësi nivelin e lumit dhe prurjet e tij, për të ndërhyrë në kohë nëse situata rëndohet më tej.
