Autoritetet kroate kanë ndaluar në kufi një ngarkesë me pjeshkë të eksportuara nga Shqipëria, pasi analizat laboratorike kanë treguar përmbajtje të lartë të nikelit. Lajmi është konfirmuar në faqen zyrtare të Sistemit të Alarmit të Shpejtë për Ushqimin (RASFF) të Komisionit Europian, ku rasti është regjistruar më datë 21 gusht 2025.
Sipas njoftimit të publikuar nga RASFF, frutat përmbanin nivele të tejkaluara të nikelit dhe paraqesin një rrezik potencial për shëndetin e konsumatorëve. Deri më tani nuk është bërë i ditur emri i kompanisë shqiptare që ka realizuar eksportin.
Ky është rasti i dytë brenda këtij viti që Kroacia refuzon një ngarkesë ushqimore nga Shqipëria për shkak të problemeve me sigurinë ushqimore. Më herët, më 12 mars 2025, autoritetet kroate ndaluan një ngarkesë me speca, gjithashtu nga Shqipëria, të cilët përmbanin nivele të larta të pesticidit flonicamid – një substancë me potencial të lartë toksik për shëndetin, sidomos për mëlçinë dhe veshkat.
Ngarkesa e specave u klasifikua nga RASFF si me rrezik serioz, për shkak të përqendrimeve të larta të këtij insekticidi, i cili përdoret zakonisht për luftimin e dëmtuesve në bujqësi dhe ka një tretshmëri të madhe në ujë.
