Mediat në Maqedoninë e Veriut raportojnë se këngëtari i njohur, Shpat Kasapi, ka ndërruar jetë në moshën 40-vjeçare.
Shkak i vdekjes së këngëtarit dyshohet arresti kardiak. Këngëtari ndërroi jetë në Bologna ku kishte shkuar për një koncert. Ai nuk ka arritur t’i mbijetojë sulmit kardiak, ndonëse nuk raportohej të kishte pasur probleme të mëparshme shëndetësore.
Lajmi është konfirmuar nga burime të afërta me familjen dhe ka shkaktuar dhimbje të madhe tek fansat dhe kolegët e artistit.
Shpat Kasapi, i lindur më 1 maj 1985 në Tetovë, u rrit në një familje me traditë muzikore dhe shumë shpejt u bë një nga emrat më të dashur të pop-muzikës shqiptare. Karriera e tij nisi fuqishëm në fillim të viteve 2000, duke sjellë një stil modern dhe një energji të veçantë në skenë, që e bënë idhull të rinisë.
Ai u afirmua si në tregun kosovar, ashtu edhe në atë shqiptar, duke krijuar hite të paharruara si “A më do?”, “Valle Kosovare”, “Dashni pa limit”, “Aroma e saj” dhe shumë këngë të tjera që u kthyen në kolona zanore të një brezi.
Këngëtari i njohur ka qenë i martuar dhe ka lënë pas një fëmijë, duke e bërë humbjen edhe më të rëndë për familjen dhe të afërmit.
