Është ndarë nga jeta në moshën 79-vjeçare aktori i njohur vlonjat i humorit, Mane Lumani. I cilësuar si një nga katër parodistët legjendarë të Vlorës, Lumani la gjurmë të rëndësishme në skenën e humorit shqiptar. Që prej vitit 2004 ai nuk fliste më, pas një ndërhyrjeje kirurgjikale në fyt, ku iu hoqën kordat e zërit për shkak të një mase tumorale.
Karrierën artistike e nisi në vitin 1974 si aktor amator në ndërmarrjen e Ullishtës, ku u dallua për talentin në humor dhe aftësinë imituese. Formimi i grupit 4 parodistët e Vlorës, së bashku me Agron Hoxha, Afrim Agalliu dhe Muhamet Lika, shënoi një moment kthese për humorin shqiptar.
Grupi u bë i njohur për paroditë satirike dhe ironike që pasqyronin realitetin e kohës. Mane Lumani mbetet një figurë e paharruar e kulturës shqiptare, me një kontribut të çmuar në artin skenik.
