Qarku i Elbasanit është përfshirë gjatë orëve të fundit nga kushte atmosferike të paqëndrueshme, të shoqëruara me reshje shiu me intensitet mesatar deri të dendur, si dhe breshër. Në zonat malore, në lartësi mbi 700 metra mbi nivelin e detit, kanë nisur reshjet e dëborës, duke krijuar nevojë për monitorim të vazhdueshëm të situatës, veçanërisht në akset rrugore.
Sipas raportimeve, të gjitha akset rrugore nacionale në qark janë aktualisht të hapura për qarkullim. Në aksin Elbasan–Qafë Thanë, konkretisht në zonën e Qafë Thanës, reshjet e dëborës kanë kërkuar menaxhim të trafikut nga shërbimet e Policisë Rrugore, të cilat po garantojnë lëvizjen e automjeteve pa probleme madhore.
Në aksin Gramsh–Moglicë është konstatuar prezencë gurësh në disa segmente, si pasojë e reshjeve, por situata është normalizuar pas ndërhyrjes së menjëhershme të firmës kontraktuese, e cila ka kryer pastrimin e rrugës.
Sa i përket situatës hidrike, prurjet e lumit Shkumbin dhe përroit të Zaranikës nuk paraqesin problematika deri në këto momente. Nga HEC Moglicë vijojnë shkarkimet në nivelin 390 m³/sekondë, paralelisht me prodhimin e energjisë elektrike. Këto prurje nuk kanë shkaktuar probleme në Bashkinë Cërrik, përjashtuar daljen e lumit Devoll në disa pika, duke sjellë përmbytjen e disa sipërfaqeve toke bujqësore.
Në Bashkinë Belsh, konkretisht në fshatin Shelg të Njësisë Administrative Grekan, situata mbetet e pandryshuar. Si pasojë e prurjeve të mëdha të lumit Devoll, vijojnë përmbytjet e tokave djerrë dhe atyre bujqësore, pa rrezik për banesat.
Furnizimi me energji elektrike në qark paraqitet përgjithësisht i qëndrueshëm. Megjithatë, ndërprerje janë raportuar në Njësitë Administrative Klos dhe Mollas, si pasojë e rënies së disa shtyllave elektrike të dëmtuara nga prurjet e lumit Devoll. Strukturat përkatëse janë në ndjekje të situatës për rikthimin sa më të shpejtë të furnizimit normal.
Ndërkohë, reshjet e dëborës me intensitet të lartë kanë rinisur në zonën e Qafë Thanës, në territorin e Pogradecit. Aktualisht, qarkullimi i mjeteve kryhet pa përdorimin e zinxhirëve, ndërsa kontraktorët janë në terren duke kryer kriposjen dhe pastrimin e vazhdueshëm të rrugës.
Autoritetet bëjnë me dije se, pas bllokimit të aksit Qukës–Qafë Plloçë katër ditë më parë për shkak të rrëshqitjeve të inerteve, Qafë Thana mbetet aktualisht i vetmi aks i hapur që lidh juglindjen e vendit me Shqipërinë e mesme, duke e bërë këtë segment jetik për qarkullimin.
Sipas parashikimeve, reshjet e dëborës pritet të vijojnë edhe në orët në vijim. Për garantimin e qarkullimit janë vënë në dispozicion disa mjete borepastruese, ndërsa temperaturat shënojnë rreth 0 gradë Celsius. Autoritetet u bëjnë thirrje drejtuesve të mjeteve të tregojnë kujdes të shtuar gjatë lëvizjes.
Situata në aksin Qafë Plloçë–Qukës, e njohur si “rruga e florinjtë”, vijon të mbetet problematike. Në vendin e quajtur Ura e Golikut ka rrëshqitje masivi dherash dhe inertesh, ndërsa në dalje të fshatit Udenisht drejt Pogradecit është konstatuar prezencë uji në rrugën nacionale.
Si pasojë e përmbytjeve dhe rrëshqitjeve të dherave, janë evakuuar 1 familje në fshatin Çërravë, 3 familje në fshatin Dardhas dhe 1 familje në fshatin Verdovë, për shkak të gërryerjes së bazamentit nga prurjet e lumit të Verdovës. Në fshatin Çezmë, Njësia Administrative Trebinjë, janë shënuar shkarje dherash, por aktualisht nuk rrezikohen banesa dhe situata po monitorohet nga autoritetet përkatëse.
