Ish-kryetarja e LSI-së, Monika Kryemadhi, ka folur hapur për transformimin e jetës së saj pas divorcit nga ish-presidenti Ilir Meta, si dhe për sfidat pas largimit nga skena politike.
Në një rrëfim të sinqertë, Kryemadhi u shpreh se sot ndihet më e lirë, më e qetë dhe më e fokusuar te vetja e familja. Ajo tregoi edhe ndryshimin simbolik në rutinën e ditës.
“Tani jam më e lirë. I vetmi ndryshim që kam sot është se në mëngjes, nëse më parë në krevat kisha Ilir Metën, sot kam Bora Metën. Kam një jetë më të qetë, një ritual më të qetë, merrem me veten… Pa titull. S’kam pasur titull më parë, kam qenë në shërbim të të tjerëve. Të tjerët e kanë përdorur titullin tim,” tha Kryemadhi.
Ajo foli edhe për ndikimin e divorcit tek fëmijët, duke theksuar se ndonëse të lënduar, ata janë sot më të pjekur e më të qetë.
“Fëmijët janë shumë të rritur. Divorci i rriti edhe më shumë. Nuk e prisnin, por janë të qetë, të pjekur. Të lënduar pa diskutim, por për shkak të shkollimit mendojnë ndryshe. Tani po njohin tamam nënën dhe babanë. Na shihnin si njerëz hermetikë dhe robotë,” u shpreh ajo.
Duke folur për periudhën e saj në politikë, Kryemadhi bëri një deklaratë të fortë, ku theksoi se goditjet më të mëdha nuk i ka marrë nga kundërshtarët, por nga brenda radhëve.
“Mua s’më hëngri politika, por shokët. Historitë u përdorën për të larguar Monikën. Po ta shikosh historikun tim, unë kam promovuar vetëm të rinjtë. Largimi im, largoi mekanizmin e barazisë. Erdhën njerëz nga rruga që e rrudhën partinë,” deklaroi ajo.
